Հունիսի 6-ին մահացած պայմանագրային զինծառայողի ձեռքերին վնասվածքներ կային, հայտնում է Armlur.am-ը։
Քննչական կոմիտեն հայտնել էր, որ պայմանագրային զինծառայող Ռ.Խ.-ի մահվան դեպքի առթիվ նախաձեռնվել է քրեական վարույթ։
«Զինվորին գտել են զորամասում՝ զենքով բերանի մեջ կրակած վիճակում։ Դեռ ավելին՝ դեպքը տեղի է ունեցել մարզերից մեկում նոր կազմավորված զորամասում։ Մեզ հասած բացառիկ տեղեկությունների համաձայն՝ իրավապահ համակարգում արձանագրել են, որ զինվորը դեպքից առաջ փորձել էր վնասել ձեռքերը, ձեռքերի վրա ոչ շատ խորության «խազեր» կան»,- գրել է թերթը։
Ըստ թերթի՝ գործով քրեական վարույթը նախաձեռնվել է ինքնասպանության հասցնելու հատկանիշներով։
Նշվում է, որ զինծառայող Ռ.Խ.-ն բանակ էր զորակոչվել որպես ժամկետային զինծառայող, իսկ 6 ամիս անց ընդգրկվել էր «Պաշտպան Հայրենյաց» ծրագրում։ Այս ծրագրով 18-ամյա զինծառայողը 6 ամիս ծառայելուց հետո կարող էր 5 տարով դառնալ պայմանագրային զինծառայող։
Զորամասում զինվորին շատ խելացի ու պատրաստված անձնավորություն են համարել․ «Մի քանի լեզուների էր տիրապետում, խելոք ու լավ տղա էր»։
Սա հունիս ամսվա ընթացքում զինվորի մահվան 2-րդ դեպքն է, երբ քրեական վարույթը նախաձեռնվում է ինքնասպանության հասցնելու հատկանիշներով։ Հունիսի 2-ին զինվոր Արամայիս Գևորգյանին գտել էին կախված վիճակում։ Մահացած զինվորի գործով 4 անձ էր կալանավորվել։
