Զանգեզուրի պղնձամոլիբդենային կոմբինատում 11 օր տևած գործադուլը հովանավորվել է իշխանական ամենաբարձր մակարդակով, գրել է «Հրապարակ» օրաթերթը։
Ըստ թերթի՝ փետրվարի 11-ին իրավիճակը հանգուցալուծվել է, երբ գլխավոր տնօրեն Ռոման Խուդոլին իր տված հարցազրույցում սպառնացել է հնչեցնել այն մարդկանց անունները, ովքեր կանգնած են դրա հետևում։
Հրապարակման համաձայն՝ իրավիճակը ԶՊՄԿ-ում փոխվել է դեկտեմբերից, երբ Պաշտպանության նախարար Սուրեն Պապիկյանի մտերիմը գնել է «Ինգո» ապահովագրական ընկերությունը, և իշխանության վերնախավից կոմբինատի ղեկավարությանը հորդորել են պայմանագրերը կնքել այդ ընկերության հետ:
«արչապետի աշխատակազմից փորձել են օգտվել օրինաչափ դժգոհություններից և հասնել նրան, որ փոխվի կոմբինատի տնօրինությունը։ Բացի այդ, ըստ լրատվականի, Սյունիքի մարզպետ Ռոբերտ Ղուկասյանն այս ընթացքում ընդհատակ էր անցել:
Հունվարի 31-ից ԶՊՄԿ-ի մի շարք աշխատակիցներ գործադուլի միջոցով պահանջում էին աշխատավարձերի 50%-ով բարձրացում և վերադասի հետ բաց երկխոսության ապահովում: Փետրվարի 1-ին կոմբինատի մամուլի խոսնակ Արայիկ Մարգարյանն Armenia Today-ին ասել էր, որ հունվարից ուժի մեջ էր մտել ընկերության կողմից աշխատավարձերի հավասարեցման համապատասխան որոշումը, ինչը դժգոհություն էր առաջացրել։
Փետրվարի 7-ին ԶՊՄԿ-ում գործադուլի ֆոնին 8 աշխատակցի ազատել էին աշխատանքից՝ տեղեկացնելով, որ այդ պահից նրանց հայտարարությունները կրում են «մասնավոր բնույթ»: ԶՊՄԿ-ն փետրվարի 9-ին հայտարարել էր, որ «ընկերության հետ առնչություն չունեցող անձինք հրապարակայնորեն և ուղղակի սպառնալիքներով իրենց աշխատակիցներին կոչ են անում չգնալ աշխատանքի և խոչընդոտել ընկերության գործունեությունը»։
Փետրվարի 10-ին ԶՊՄԿ-ից հայտնել էին, որ աշխատողների աշխատանքային պայմանները բարելավելու նպատակով մի շարք փոփոխություններ կիրականացնեն։ Նաև նշել էին, որ աշխատավարձային ֆոնդը կավելանա միջինը 20%-ով։ Նույն օրն՝ ավելի ուշ, ակցիայի մասնակիցները տեղեկացրել էին, որ կվերադառնան աշխատանքի։
ԶՊՄԿ-ն 2024 թվականի արդյունքներով գլխավորել էր Հայաստանի 1000 խոշոր հարկատուների ցանկը։ 2024 թվականի դեկտեմբերին վարչապետ Նիկոլ Փաշինյանը հայտարարել էր, որ ԶՊՄԿ-ն ՀՀ պետական բյուջե էր փոխանցել 33,25 մլրդ դրամ՝ որպես կառավարության շահաբաժին։
