Զանգեզուրի պղնձամոլիբդենային կոմբինատի աշխատակիցները կվերադառնան աշխատանքի, հայտնել է գործադուլի համակարգող խորհրդի անդամ Վահե Մխիթարյանը։
Նրա խոսքով՝ կոմբինատի ղեկավարության հետ պայմանավորվածություն է ձեռք բերվել, որ աշխատավարձերի ֆոնդի 20%-ի բարձրացումը պետք է տեղի ունենա սոցիալական արդարության բաշխման սկզբունքով, բացառվեն բողոքի ակցիայի մասնակցիների հետապնդումները, վերանայվեն աշխատակիցներին աշխատանքից ազատելու հրամանները։
«Առաջնորդնվելով պետական շահով, սոցիալական գործընկերության սկզբունքով և դրսևորելով կառուցողական մոտեցում՝ որոշում ենք կայացրել վերագործարկել ԶՊՄԿ-ի աշխատանքային ռեժիմը։ Մեր գործընկերների աշխատանքից հեռացման իրավաչափությունը քննարկելու ենք վերադասության սկզբունքով և անհրաժեշտության դեպքում՝ դատական կարգով»,- ասել է նա։
Քաջարան համայնքի ղեկավարը և ավագանին աշխատակիցներին կոչ են արել վերադառնալ բնականոն աշխատանքի և վերագործարկել կոմբինատի աշխատանքային պրոցեսը։
«Սթափվե՛ք և անդառնալի կորուստներից ու զրկանքներից խուսափելու համար վերադարձեք աշխատանքի և միշտ հիշեք, որ մենք ենք ստեղծելու մեր և մեր երեխաների ճակատագրերը»,- ասվում է հայտարարության մեջ։
Նրանք զգուշացրել են, որ գործադուլը շարունակելու դեպքում անգործությունը ժամ առ ժամ ծանր և անդառնալի հարվածներ կհասցնի։
Այսօր ավելի վաղ ԶՊՄԿ-ից հայտնել էին, որ աշխատողների աշխատանքային պայմանները բարելավելու նպատակով մի շարք փոփոխություններ կիրականացնեն։ Նաև նշել էին, որ աշխատավարձային ֆոնդը կավելանա միջինը 20%-ով։
Հունվարի 31-ից ԶՊՄԿ-ի մի շարք աշխատակիցներ գործադուլի միջոցով պահանջում էին աշխատավարձերի 50%-ով բարձրացում և վերադասի հետ բաց երկխոսության ապահովում: Փետրվարի 1-ին կոմբինատի մամուլի խոսնակ Արայիկ Մարգարյանն Armenia Today-ին ասել էր, որ հունվարից ուժի մեջ էր մտել ընկերության կողմից աշխատավարձերի հավասարեցման համապատասխան որոշումը, ինչը դժգոհություն էր առաջացրել։ Փետրվարի 7-ին ԶՊՄԿ-ում գործադուլի ֆոնին 8 աշխատակցի ազատել էին աշխատանքից՝ տեղեկացնելով, որ այդ պահից նրանց հայտարարությունները կրում են «մասնավոր բնույթ»: ԶՊՄԿ-ն փետրվարի 9-ին հայտարարել էր, որ «ընկերության հետ առնչություն ունեցող անձինք հրապարակայնորեն և ուղղակի սպառնալիքներով իրենց աշխատակիցներին կոչ են անում չգնալ աշխատանքի և խոչընդոտել ընկերության գործունեությունը»։
ԶՊՄԿ-ն 2024 թվականի արդյունքներով գլխավորել էր Հայաստանի 1000 խոշոր հարկատուների ցանկը։ 2024 թվականի դեկտեմբերին վարչապետ Նիկոլ Փաշինյանը հայտարարել էր, որ ԶՊՄԿ-ն ՀՀ պետական բյուջե էր փոխանցել 33,25 մլրդ դրամ՝ որպես կառավարության շահաբաժին։
