Վրաստանում ոստիկանությունն արցունքաբեր գազ է կիրառել բողոքի ցույց իրականացնող ցուցարարների նկատմամբ, կան բերման ենթարկվածներ, հայտնել է ՏԱՍՍ-ը։
Նշվում է, որ ՆԳՆ հատուկ նշանակության ուժերի աշխատակիցներն ամբողջությամբ դուրս են մղել ցուցարարներին Թբիլիսիի Ռուսթավելի պողոտայից:
«Ռուսթավելի պողոտայում ցուցարարների և ոստիկանության միջև բախումը տևել է ամբողջ գիշեր։ Ցույցի մասնակիցներն այրել են աղբամաններ և փայտե աթոռներ՝ փորձելով մեկուսանալ իրավապահներից։ Ժամանակ առ ժամանակ նրանց միջև բախումներ են տեղի ունեցել։ Ոստիկանությունն օգտագործել է ջրցան մեքենաներ»,- ասված է հրապարակման մեջ։
Վրաստանում բողոքի ցույցերը նոր թափ են ստացել նոյեմբերի 29-ին՝ կապված նոյեմբերի 28-ին Վրաստանի իշխանությունների որոշման հետ, ըստ որի՝ մինչև 2028 թվականը նրանք օրակարգից հանել են Եվրամիությանը երկրի անդամակցության շուրջ բանակցությունները։
Հոկտեմբերի 26-ին Վրաստանում անցկացվել էին խորհրդարանական ընտրություններ։ Վրաստանի Կենտրոնական ընտրական հանձնաժողովի տվյալներով՝ հաղթել էր «Վրացական երազանքը»։
Վրաստանի նախագահը, «Հանուն փոփոխությունների», «Միասնություն ազգային շարժում» և «Ուժեղ Վրաստան» կոալիցիան չէին ճանաչել ընտրությունների արդյունքները։ Բոլոր չորս կուսակցությունները հրաժարվել էին աշխատել նոր խորհրդարանում և նախագահի հետ բողոքի ցույցի էին դուրս եկել։
Օգոստոսի 19-ին Վրաստանի վարչապես Իրակլի Կոբախիձեն հայտարարել էր, որ խորհրդարանական ընտրությունները կդառնան խաղաղության և պատերազմի միջև հանրաքվե։
