Միջազգային քրեական դատարանի նախկին դատախազ Լուիս Մորենո Օկամպոն Արցախի նախկին առաջնորդների ձերբակալությունն Ադրբեջանում անվանել է «ցեղասպանության գագաթնակետ», հայտնել է Ամերիկայի Հայ դատի հանձնախումբը (ANCA) X-ում (նախկին Twitter)։
«Նրանց բանտարկությունն ուղերձ է հայերին։ Եթե վերադառնաս Լեռնային Ղարաբաղ, քեզ սովամահ կանեն, կնվաստացնեն կամ կսպանեն։ Այս մարդկանց գերեվարումը ցեղասպանության գագաթնակետն է»,- ՄԱԿ-ի Մարդու իրավունքների խորհրդի Ցեղասպանության կոնվենցիայի 75-րդ տարելիցի նվիրված միջխորհրդարանական հանդիպման ժամանակ ասել է նա:
Օկամպոն հիշեցրել է, որ Ադրբեջանի զինված ուժերի սեպտեմբերյան ագրեսիայից հետո Լեռնային Ղարաբաղի գրեթե ողջ հայ բնակչությունը ստիպված է եղել լքել իր տները, իսկ Հայաստան վերաբնակվելու ճանապարհին ադրբեջանցիները գերել են բազմաթիվ պետական պաշտոնյաների:
Սեպտեմբերի 30-ին հայտնել էինք, որ Ադրբեջանում կալանավորվել են Արցախի նախկին արտգործնախարար և նախագահի օգնական Դավիթ Բաբայանը և Արցախի բանակի նախկին հրամանատար, գեներալ-լեյտենանտ Լևոն Մնացականյանը, որոնք ավելի վաղ գերեվարվել էին Բաքվի կողմից։ Դավիթ Բաբայանը գերեվարվել էր սեպտեմբերի 30-ին, իսկ Լևոն Մնացականյանը՝ սեպտեմբերի 29-ին։ ՊԲ հրամանատարի նախկին տեղակալ Դավիթ Մանուկյանը՝ ՀՀ պատգամավոր Գեղամ Մանուկյանի եղբայրը, ևս սեպտեմբերի 29-ին էր գերեվարվել։ Սեպտեմբերի 28-ին գերեվարվել էր նաև Արցախի նախկին պետնախարար Ռուբեն Վարդանյանը։
Հոկտեմբերի 3-ին հայտնի էր դարձել Արցախի երեք նախկին նախագահների և ԱԺ նախագահի գերեվարման մասին, որոնց Ադրեջանն ավելի ուշ՝ հոկտեմբերի 5-ին, ձերբակալել էր։ Նույն օրը հայտնի դարձավ, որ Բաքվի դատարանը չորս ամսով կալանավորել է Արցախի երկու նախկին նախագահներ Արկադի Ղուկասյանին և Բակո Սահակյանին, ինչպես նաև Արցախի Ազգային ժողովի նախագահ Դավիթ Իշխանյանին։
