ՀՀ վարչապետի մամուլի քարտուղար Նազելի Բաղդասարյանի հետ համատեղ ասուլիսում Ներքին գործերի նախարարության միգրացիայի և քաղաքացիության ծառայության պետ Արմեն Ղազարյանը հայտնել է, որ ԼՂ որ շրջաններից բռնի տեղահանված քանի անձ է տեղափոխվել ՀՀ։
«Ժամը 20:00-ի դրությամբ Լեռնային Ղարաբաղից Հայաստանի սահմանը հատել է 76 հազար 407 բռնի տեղահանված անձ, ժամը 19:00-ի դրությամբ հաշվառվել է շուրջ 55 հազար 248 անձ։ Հաշվառված անձանցից 26 հազար 575-ն արական սեռի են, 28 հազար 670-ը՝ իգական: Հաշվառվածների թվում կա 1172 հաշմանդամություն ունեցող անձ և 133 հղի: Հաշվառվածների մեծ մասը Ստեփանակերտից են՝ 27 հազար 408 անձ, Մարտակերտի շրջանից 10 հազարից ավելի անձ, Ասկերանի շրջանից՝ 7 հազար 500-ից ավելի անձ, Մարտունու շրջանից շուրջ 7 հազար անձ, և այսպես շարունակ»,- ասել է նա:
Արմեն Ղազարյանը նաև նշել է, որ սահմանը հատած և փաստաթուղթ չունեցող անձինք նույնականացումն անցնում են բնակչության ռեգիստրի միջոցով:
Նախնական կարիքների գնահատման գործընթացի արդյունքում ստացված տվյալները, ըստ Արմեն Ղազարյանի, փոխանցվում են համապատասխան գերատեսչություններ հաշվառված անձանց հետագա մասնագիտական զբաղվածության, կրթության, տարեցների խնամքն ապահովելու նպատակով:
Սեպտեմբերի 19-ին Ադրբեջանը լայնամասշտաբ հարձակում էր սկսել Արցախի Հանրապետության նկատմամբ։ Ադրբեջանի ՊՆ-ն նշել էր, որ, իբր, քաղաքացիական բնակչությունը և քաղաքացիական ենթակառուցվածքի օբյեկտները թիրախ չեն, շարքից հանվում են միայն «ռազմական թիրախները»: Վերջին տվյալներով՝ Արցախի դեմ ադրբեջանական ագրեսիայի հետևանքով կա 200 զոհ (10 խաղաղ բնակիչ, այդ թվում՝ 5 երեխա) և 400 վիրավոր (40 խաղաղ բնակիչ, այդ թվում՝ 13 երեխա)։
ԼՂ-ում տեղակայված ռուսական խաղաղապահ զորակազմի հրամանատարության միջնորդությամբ պայմանավորվածություն էր ձեռք բերվել 2023 թվականի սեպտեմբերի 20-ի ժամը 13:00-ից մարտական գործողություններն ամբողջությամբ դադարեցնելու մասին, որի պայմաններն էին՝ հայկական զինված կազմավորումները վայր են դնում զենքերը, լքում մարտական դիրքերն ու ամբողջությամբ զինաթափվում, հանձնվում է ողջ սպառազինությունն ու ծանր տեխնիկան։
Պայմանավորվածության համաձայն՝ սեպտեմբերի 21-ին Եվլախում տեղի էր ունեցել Արցախի և Ադրբեջանի ներկայացուցիչների հանդիպումը։ Ստեփանակերտը հայտնել էր, որ կողմերը հատուկ ընդգծել են, որ առկա բոլոր հարցերն անհրաժեշտ է քննարկել խաղաղ մթնոլորտում՝ հանդիպումները շարունակելու պատրաստակամությամբ։
Սեպտեմբերի 28-ին Արցախի նախագահ Սամվել Շահրամանյանը ԱՀ պետական համակարգը լուծարելու հրամանագիր է ստորագրել, որով Արցախի Հանրապետությունը դադարում է գոյություն ունենալ։
