Ռուսաստանի ԱԳՆ պաշտոնական ներկայացուցիչ Մարիա Զախարովան հայտարարել է, որ Մոսկվան Հայաստանի հետ հարաբերությունները չի կապում հունիսի 7-ին կայանալիք խորհրդարանական ընտրությունների հետ և իր քաղաքականությունը չի հարմարեցնում Հայաստանում ընթացող ընտրական գործընթացներին:
Նրա խոսքով՝ Ռուսաստանը հայաստանյան նախընտրական արշավի հետ կապված ոչ մի քայլ չի ձեռնարկել, իսկ Մոսկվայի հարցերը պայմանավորված են Եվրոպական միության և արևմտյան կառույցների հետ մերձեցմանն ուղղված Երևանի կուրսով:
Ռուսական արտաքին գործերի գերատեսչության ներկայացուցիչը հայտարարել է, որ Մոսկվայի մոտ հարցեր են առաջացել, թե ինչպե՞ս է Հայաստանը մտադիր համատեղել ԵՄ-ի հետ հարաբերությունների զարգացումն արդեն իսկ գոյություն ունեցող ինտեգրացիոն միավորումների շրջանակներում ստանձնած պարտավորությունների հետ: Նրա խոսքով՝ ռուսական կողմը Երևանի հետ շփումներում բազմիցս բարձրացրել է այս թեման, սակայն մինչ օրս որևէ «հստակ պատասխան» չի ստացել:
Զախարովան նաև ընդգծել է, որ Ռուսաստանը մտադիր չէ «վճարել Եվրոպական միություն տանող ճանապարհի համար» և բացահայտորեն արտահայտելու է իր դիրքորոշումը Հայաստանի արտաքին քաղաքական կուրսի վերաբերյալ:
Հայաստանի և Ռուսաստանի միջև հարաբերությունները շարունակում են լարված մնալ, Մոսկվայի գնահատմամբ, Երևանի աշխարհաքաղաքական կուրսի անհստակության պատճառով։
Մայիսի 29-ին ԵԱՏՄ երկրների առաջնորդները Հայաստանին կոչ էին արել եվրաինտեգրման հարցով հանրաքվե անցկացնել։ Ռուս պաշտոնյաները նաև նախազգուշացրել էին Հայաստանին՝ Եվրոպական միություն մտնելու դեպքում մի շարք տնտեսական առավելությունների հնարավոր կորստի մասին: Ի պատասխան՝ վարչապետ Նիկոլ Փաշինյանը հայտարարել էր, որ ԵՄ-ին Հայաստանի անդամակցության թեմայով հանրաքվեն հնարավոր է միայն, երբ Երևանը պաշտոնապես կդիմի Եվրոպական միությանը կամ երբ երկիրը կստանա թեկնածուի կարգավիճակ:
2025 թվականի հունվարին Հայաստանի կառավարությունը հավանություն էր տվել Եվրոպական միությանը երկրի անդամակցության գործընթաց սկսելու օրինագծին:
