ՌԴ-ի, Բելառուսի, Ղազախստանի և Ղրղզստանի առաջնորդները համատեղ հայտարարությամբ հորդորել են ՀՀ-ում Եվրամիությանն անդամակցելու կամ ԵԱՏՄ-ում մնալու հարցով հանրաքվե անցկացնել, տեղեկանում ենք Կրեմլի պաշտոնական կայքից։
«Մենք կիսում ենք դիրքորոշումը Հայաստանում հնարավորինս շուտ ազգային հանրաքվե անցկացնելու անհրաժեշտության վերաբերյալ՝ Եվրամիությանը միանալու կամ Եվրասիական տնտեսական միությունում մնալու վերաբերյալ»,- ասված է Կրեմլի կայքում հրապարակված հայտարարության մեջ։
Ստորագրող երկրներն իրենց դիրքորոշումը բացատրել են 2025 թվականին ՀՀ ԱԺ-ի կողմից «ԵՄ-ին միանալու գործընթացի մեկնարկի մասին» ՀՀ օրենքի հաստատումը և ՀՀ նախագահի կողմից ստորագրումը, ինչպես նաև ԵՄ-ի կողմից ՀՀ կառավարության եվրոպական ձգտումների վերահաստատումը, որոնք արտահայտվել են 2026 թվականի մայիսի 5-ին ընդունված Հայաստան-ԵՄ առաջին գագաթնաժողովից հետո ընդունված համատեղ հայտարարության մեջ։
Ըստ նրանց՝ ՀՀ-ի՝ ԵՄ-ին միանալու նախապատրաստական աշխատանքները ռիսկային են ԵԱՏՄ-ի համար, որը կանխելու անհրաժեշտություն են տեսնում։
ԵԱՏՄ պայմանագրի կասեցման հնարավոր հետևանքների վերաբերյալ զեկույցը Հայաստանի համար կներկայացվի դեկտեմբերին կայանալիք Բարձրագույն Եվրասիական տնտեսական խորհրդի նիստում։
Մայիսի 22-ին ՌԴ փոխվարչապետ Ալեքսեյ Օվերչուկը հայտարարել էր, որ Եվրամիությանն անդամակցելու որոշման պարագայում Հայաստանը կկորցնի որոշակի արտոնություններ, երկրի համար կսահմանվեն մաքսատուրքեր, ինչպես նաև կփոխվեն գազի և էլեկտրաէներգիայի սակագները։
ՌԴ նախագահ Վլադիմիր Պուտինը կոչ էր արել հայկական իշխանություններին կողմնորոշվել ԵԱՏՄ-ի և ԵՄ-ի միջև, իսկ ՌԴ ԱԳ նախարար Սերգեյ Լավրովն զգուշացրել էր ԵԱՏՄ արտոնությունների հնարավոր կորստի մասին: Ավելի ուշ Օվերչուկը հայտարարել էր, որ Հայաստանը ԵԱՏՄ-ից դուրս գալու ծրագրեր չունի։
