Փետրվարի 23-ին բժիշկներն Ազգային ժողով են հանձնել նամակներ՝ պահանջելով փոխել պարտադիր առողջապահական ապահովագրության շրջանակում վարձատրության գործող կարգը և նախաձեռնել խորհրդարանական լսումներ։ Ակցիան հեռարձակվել է Armenia Today-ի Youtube-յան ալիքով։
Խնդիրը, նրանց խոսքով, առաջացել է համակարգի ներդրումից հետո գործող նոր մեխանիզմի և իրականացված հաշվարկների պատճառով, ինչի հետևանքով մի շարք բուժաշխատողներ ստացել են ավելի քիչ աշխատավարձ, քան ստանում էին մինչ համակարգի ներդրումը։
ԱԺ-ի մոտ բժիշկ Գևորգ Գրիգորյանը և առողջապահության ոլորտի փորձագետ, «Առողջության իրավունք» ՀԿ հիմնադիր նախագահ Անուշ Պողոսյանը լրագրողներին հայտնել են, որ պարտադիր առողջապահական ապահովագրության համակարգի ներդրումից հետո՝ փետրվարին, մի շարք բուժաշխատողներ ստացել են մինչև 2-3 անգամ պակաս աշխատավարձ, իսկ առանձին դեպքերում՝ 19 հազար դրամ։
Գրիգորյանը նշել է, որ նամակներ են հանձնել ԱԺ բոլոր խմբակցություններին և Ազգային ժողովի նախագահ Ալեն Սիմոնյանին՝ աշխատավարձի հարցով խորհրդարանական լսումներ անցկացնելու պահանջով։
«Պահանջում ենք փոխել բժիշկներին վճարելու կարգը, փոխել նվազագույն շեմը։ Պահանջում ենք վերահաշվարկել բուժաշխատողի վարձատրման մեխանիզմը, ապահովագրական համակարգին դեմ չենք։ Այո, ապահովագրությունը մեր երկրի բնակիչների համար է, պարզապես այդ հարցը պետք է լուծվի ոչ թե բուժաշխատողների, այլ պետության հաշվին»,- ընդգծել է Գրիգորյանը։
Նա շեշտել է, որ համակարգի ներդրումից հետո բուժաշխատողների նկատմամբ սոցիալական արդարություն չի կիրառվում։
«Բնակչության մի հատվածը չպետք է պետք մյուս շերտի խաթր տուժի»,- հավելել է նա։
Նրա խոսքով՝ բժիշկների աշխատավարձի հաշվարկման մեխանիզմը փոխել են մարդիկ, ովքեր բուժառուների հետ ամենօրյա շփման մեջ չեն։
«Մեխանիզմը փոխել են մարդիկ, ովքեր տիտանական աշխատանք չեն կատարում։ Մարդիկ, ովքեր կյանքեր չեն փրկում, որոշել են, որ բուժաշխատողի աշխատավարձը պետք է այդպես հաշվարկվի, այդքան լինի։ Բուժաշխատողներն էլ արդարացի բողոքում են, որովհետև 19 000 աշխատավարձով ո՞վ կաշխատի։ Կան դեպքեր, երբ 23 000, 50 000 են ստացել, ինչը նույնպես աբսուրդ է»,- շեշտել է բժիշկը։
Գրիգորյանը տեղեկացրել է նաև, որ խնդրի մասին բարձրաձայնող ու բողոքող բժիշկներն աշխատանքից հեռացվելու սպառնալիքներ են ստանում։ Միևնույն ժամանակ՝ նա չի բացառել՝ բժիշկները դուրս կգան փողոց, եթե խորհրդարանական լսումներ անցկացնելու իրենց պահանջը չկատարվի։
Փորձագետի խոսքով՝ ոլորտի մասնագետները և իրավասու մարմինները պետք է կառուցողական դաշտում գույքագրեն ապահովագրության մեկնարկի երկու ամսվա ընթացքում արձանագրած խնդիրները և լուծումներ գտնեն։ Նա ընդգծել է, որ պետք է կանխել կարևոր համակարգի ներդրման հնարավոր ձախողումը։
«Բնակիչները հիվանդանոցներում շատ լուրջ խնդիրների են բախվում։ Նույն իրավիճակն է նաև բժշկական կենտրոնների և բուժանձնակազմի համար։ Բուժաշխատողներն առաջին աշխատավարձն ստացել են ուշացումով․ հունվարի աշխատավարձը, եթե չեմ սխալվում, փետրվարի 20-ին են ստացել։ Դեղատներին էլ մինչև փետրվարի 20-ը փոխհատուցված դեղերի գումարները չէին փոխանցել, և դեղատներից ահազանգում էին իրենց պարտքերի մասին»,- հավելել է Պողոսյանը։
Փորձագետի դիտարկմամբ՝ եթե բուժաշխատողների աշխատավարձի հաշվարկի վերանայում չլինի, իրավիճակը գնալով ավելի խնդրահարույց է դառնալու։
«Բուժաշխատողների աշխատավարձը կառուցվում է ըստ ապահովագրական սակագների՝ քեյսերի։ Եթե ապահովագրական քեյսերի գումարները, ծառայությունները չվերանայվեն, հատկապես՝ արտահիվանդանոցային բժշկական հաստատություններում աշխատողների աշխատավարձերի առումով ավելի խնդրահարույց իրավիճակ ենք ունենալու»,- մտահոգություն է հայտնել փորձագետը։
ԱԺ-ի մոտ հավաքված փորձագետներն ու բժիշկները կառուցողական քննարկում են առաջարկել մասնագիտական հանրույթին, պետական մարմիններին՝ մոտեցումները վերնայելու կոչ արել։
ՀՀ կառավարությունը 2023-ի փետրվարին հաստատել էր համակարգի ներդրման հայեցակարգը։ 2025-ի հոկտեմբերի 1-ին Առողջապահության նախարար Անահիտ Ավանեսյանը հայտարարել էր 2026-ից պարտադիր առողջապահական ապահովագրության համակարգի գործարկման մասին։ 2026-ի հունվարից համակարգը հասանելի է մինչև 18 տարեկանների, 65+ տարիքի և 200 հազար և ավելի աշխատավարձ ստացող ՀՀ քաղաքացիների համար։
Կարդացեք նաև՝
ՀՀ-ում բժշկական ապահովագրությունը գործարկվել է առանց նախապատրաստման և սխալ հաշվարկներով․ փորձագետ
