Հայ դահուկորդ Միքայել Միքայելյանի կողմից Իտալիայում «Ադրբեջան» բառը մարզահագուստի վրայից փակելու և դրա շուրջ առաջացած սկանդալի ֆոնին Հայաստանի դահուկային սպորտի ֆեդերացիայի նախագահ Գագիկ Սարգսյանը հայտարարել է պաշտոնից հեռանալու մասին։
Սարգսյանն ավելի վաղ հայտնել էր, որ Միքայելյանի քայլից հետո նրա նկատմամբ կիրառված տուգանքը կվճարի Հայաստանի դահուկային սպորտի ֆեդերացիան։
«Արդեն 21 տարի է, ինչ զբաղվում եմ դահուկավազքով։ 2005 թվականին ընտրվել եմ ֆեդերացիայի գլխավոր քարտուղար։ 2021 թվականին դարձել եմ ֆեդերացիայի նախագահ։ Որոշում եմ կայացրել վայր դնել Հայաստանի դահուկային սպորտի ֆեդերացիայի նախագահի լիազորությունները։ Դա ինձ համար շատ դժվար և բարդ որոշում է։ Ես երկար եմ մտածել և փորձել չգնալ այդ որոշմանը, բայց այն, ինչ սկիզբ ունի, ունի նաև վերջ», - նշել է նա:
Ֆեդերացիայի ղեկավարը նշել էր, որ միջազգային կոնգրեսում քվեարկել է Ադրբեջանի՝ Միջազգային ֆեդերացիայի լիիրավ անդամակցության դեմ՝ պահանջելով, որ ադրբեջանական կողմը հստակ արտահայտի իր դիրքորոշումը՝ դատապարտո՞ւմ է արդյոք սպորտային և քաղաքացիական ենթակառուցվածքների ռմբակոծությունը: Հայաստանի կրթության, գիտության, սպորտի և երիտասարդության նախարար Ժաննա Անդրեասյանը նշել էր, որ «սպորտը պետք է մնա սպորտ»։
Սարգսյանն իր հրաժարականի մի քանի պատճառ է նշել՝ մատնանշելով նաև նախարարության կողմից ֆեդերացիայի ֆինանսավորման բացակայության մասին. հիմնականը Հայաստանում դահուկային սպորտի զարգացման համար աշխատանքային մթնոլորտի բացակայությունն է՝ նրա խոսքոց:
Սարգսյանը շեշտել է՝ զարգացումը հնարավոր չէ միայն ֆեդերացիայի կամ նրա ղեկավարի ուժերով. «Տարիներ շարունակ մեր բոլոր առաջարկությունները, խնդրանքները, կոչերը, անգամ բողոքները՝ ուղղված Հայաստանի պետական լիազոր մարմնին, տվյալ դեպքում՝ Կրթության, գիտության, մշակույթի և սպորտի նախարարությանը, այդպես էլ լուծում չեն ստացել», - ընդգծել է նա:
Վերջինս հավելել է, որ չնայած ջանքերին, ինքը չի կարողանում լիարժեք իրականացնել իր գործունեությունը, քանի որ մշտապես խոչընդոտների է հանդիպում: Նա չի բացառել, որ այդ վարքագիծը պայմանավորված է իր անձով։
«Հաշվի առնելով, որ, գուցե նաև իմ անձն է խանգարող հանգամանք, որ պետությունը շատ ավելին չի անում այդ մարզաձևերի համար, ուղղակի որոշում եմ կայացրել հեռանալ ֆեդերացիայից։ Տեսեք՝ 2026 թվականի հունվարի 20-ն է, բայց մինչ օրս դեռ պետական ֆինանսավորումը չի բացվել, ֆեդերացիայի հետ պայմանագիր չի կնքվել, և մենք արդեն ձախողել ենք չորս միջոցառում, որից մեկը միջազգային վարկանիշային վերջին մրցաշարն էր Լեհաստանում»,- ասել է Սարգսյանը։
Նրա խոսքով՝ 2026 թվականի հունվարի 20-ին և մինչ օրս ֆեդերացիայի պետական ֆինանսավորումը չի բացվել, իսկ ֆեդերացիայի հետ պայմանագիր չի կնքվել: Արդյունքում խափանվել է չորս միջոցառում, այդ թվում՝ Լեհաստանում միջազգային վարկանիշային փուլը, որը կարող էր օգնել հայ դահուկորդներին բարելավել վարկանիշային միավորներն ու ամրապնդել քվոտաները: Նա ընդգծել է, որ ձմեռային մարզաձևերում առանցքային են դեկտեմբերը, հունվարը և փետրվարը, և այդ ժամանակահատվածում ֆինանսավորման բացակայությունը անհնարին է դարձնում մրցումների անցկացումը: Նրա խոսքով՝ տարիներ շարունակ իրավիճակը կրկնվում էր. Հայաստանի առաջնություններն անցկացվում էին «պարտքով», և այժմ իրավիճակը չի փոխվել:
Առաջիկա օրերին պետք է անցկացվեին դահուկավազքի Հայաստանի մեծահասակների և պատանիների առաջնությունները, սակայն պատանեկան առաջնությունն արդեն անորոշ ժամանակով հետաձգվել է, իսկ մեծահասակների մրցումների ճակատագիրը մնում է անհայտ: Նրա պնդմամբ՝ միջազգային տեխնիկական պատվիրակները նամակներ են ուղարկում՝ հարցնելով, թե արդյոք մրցումները տեղի կունենան, և ինչպես են նրանք ժամանելու, բայց ֆեդերացիան դեռ չի կարող պատասխանել՝ պետական ֆինանսավորում ստանալու ժամկետների վերաբերյալ տեղեկատվության բացակայության պատճառով:
«Նման իրավիճակում 21 տարի առաջ սկսված գործունեությունը շարունակելն այլևս իմաստ չունի։ Ցավոք, կամ, հնարավոր է, բարեբախտաբար որոշ մարդկանց համար այն այժմ ավարտվում է», - հայտարարել է Սարգսյանը։
Նա հայտնել է նաև, որ պատրաստվում է իր կարիերան շարունակել արտերկրում, թե որտեղ, կտեղեկացնի ավելի ուշ։
Միքայելյանի նկատմամբ Դահուկային սպորտի և սնոուբորդի միջազգային ֆեդերացիան (FIS) կարգապահական պատժամիջոցներ էր կիրառել Tour de Ski միջոցառման ժամանակ հագուստի վրա կպչուն ժապավենով «Ադրբեջան» գրությունը ծածկելու համար։ Հայ մարզիկը հայտարարել էր, որ իր արժանապատվությունը, հայրենիքն ավելի վեր են։
Կարդացեք նաև՝
Իմ արժանապատվությունը, հայրենիքն ավելի վեր է․ հայ դահուկորդը՝ «Ադրբեջան» բառը փակելու մասին
Եթե որևէ մեկը մտածում է, որ «Ադրբեջան» բառը չպետք է փակեի, ամենաանարժան մարդը կլինեի. հայ դահուկորդ
Ադրբեջանը պաշտոնապես դիմել է Դահուկային միջազգային ֆեդերացիային հայ մարզիկի գործողության վերաբերյալ
