ՀՀ դահուկային սպորտի ֆեդերացիան կվճարի Միջազգային դահուկային ֆեդերացիայի կողմից հայ դահուկորդ Միքայել Միքայելյանի նկատմամբ սահմանված տուգանքը Tour de Ski-ի ժամանակ, Facebook-ում հայտնել է ֆեդերացիայի նախագահ Գագիկ Սարգսյանը։
Տուգանքը նշանակվել էր, երբ Միքայելյանը մրցույթի ժամանակ իր մրցակցային հագուստի վրա «Ադրբեջան» գրությունը ծածկել է կպչուն ժապավենով։ Այս գրությունը մրցաշարի պաշտոնական հովանավորի անունն է, քանի որ Ադրբեջանի պետական տուրիզմի գործակալությունը 2025 թվականից ի վեր Միջազգային դահուկային ֆեդերացիայի գլխավոր հովանավորն է։ Հետևաբար, դրա անունը պարտադիր է, որ հայտնվի աշխարհի գավաթի փուլերի, աշխարհի առաջնությունների և այլ խոշոր մրցաշարերի մասնակիցների համազգեստների վրա։
Ըստ Սարգսյանի՝ խնդիրը ծագել էր դեռևս 2025 թվականի մայիսին, երբ հայտնի էր դարձել, որ Ադրբեջանը ոչ միայն կդառնա Միջազգային ֆեդերացիայի հովանավոր, այլև շուտով կդառնա լիիրավ անդամ։ Նա նշել է, որ այս հարցը բարձրացրել է Միջազգային ֆեդերացիայի նախագահի հետ հանդիպման ժամանակ՝ ընդգծելով Ադրբեջանի ներգրավվածության անընդունելիությունը՝ հաշվի առնելով Հայաստանի դեմ ռազմական ագրեսիան, ինչպես նաև Ջերմուկի դահուկային սահուղիների և ճոպանուղու ռմբակոծությունը։
«Վնասելով քաղաքացիական ենթակառուցվածքներ, վնասելով Ջերմուկի ճոպանուղին, այն նույն սահուղիներին հարվածելով արկերով, որոնք գրանցված են միջազգային ֆեդերացիայի կողմից, այսինքն՝ միջազգային սերտիֆիկացում ստացած, միջազգային ֆեդերացիայի կողմից սերտիֆիկացում ստացած սահուղիների վրա են պայթել առաջին արկերը։ Բնականաբար, ես ասեցի, որ հարցը չքաղաքականացնեք, որովհետև հարցը զուտ սպորտային է․ խոսքը գնում է մարզական ենթակառուցվածքների մասին»,- ասել է Սարգսյանը։
Ֆեդերացիայի ղեկավարը նշել է, որ միջազգային կոնգրեսում քվեարկել է Ադրբեջանի լիիրավ անդամակցության դեմ՝ պահանջելով, որ ադրբեջանական կողմը հստակ արտահայտի իր դիրքորոշումը՝ դատապարտո՞ւմ է արդյոք սպորտային և քաղաքացիական ենթակառուցվածքների ռմբակոծությունը: Հայաստանի դիրքորոշմանը հակառակ՝ Ադրբեջանը դարձել է Միջազգային ֆեդերացիայի լիիրավ անդամ, և նրա անունը հետագայում հայտնվել է աշխարհի գավաթի մասնակիցների համազգեստի վրա:
Tour de Ski-ի ժամանակ Միքայելյանը կամավոր ծածկել էր «Ադրբեջան» անվանումը: Դրա համար մարզիկը հրավիրվել էր մրցույթի ժյուրիի նիստի, որտեղ նա արտահայտել էր իր դիրքորոշումն ու անհամաձայնությունը: Սակայն միջազգային ֆեդերացիայի ներկայացուցիչները հայտարարել էին, որ կանոնակարգի խախտման պատճառով իրենք պարտավոր են կիրառել ֆինանսական տուգանք: Նրանք նաև ընդգծել էին, որ հասկանում են մարզիկի փաստարկները:
Միքայելյանը չի որակազրկվել, այլ միայն տուգանվել է: Տուգանքի ճշգրիտ չափը դեռևս պաշտոնապես չի հաղորդվել ֆեդերացիային, բայց կհրապարակվի համապատասխան տեղեկատվությունն ստանալուց անմիջապես հետո: Սարգսյանն ընդգծել է, որ անկախ գումարից, տուգանքը կվճարի Հայաստանի դահուկային ֆեդերացիան: Նա նաև նշել է, որ ողջունում է Միքայելյանի գործողությունները՝ դրանք համարելով արժանապատիվ դիրքորոշում:
Ըստ Սարգսյանի՝ հայ մարզիկները պետք է մրցեն արժանապատվորեն՝ անկախ հնարավոր տուգանքներից: Նա միջադեպը գնահատել է որպես ազգային միասնության և մարզիկին աջակցության դրսևորում, որը որակել է որպես «ազգային զարթոնքի տարր»։
Ֆեդերացիայի նախագահը հավելել է, որ Հայաստանի հավաքականը մոտ ապագայում կշարունակի մասնակցել միջազգային մրցումների՝ չնայած ֆինանսական դժվարություններին, և կոչ է արել բոլորին աջակցել Միքայելյանին և նրա մարզչական շտաբին մրցումների և ուսումնամարզական հավաքների կազմակերպման գործում։
