Հայաստանի թիմը մեկ արծաթե և չորս բրոնզե մեդալ է նվաճել Չինաստանի Շանհայ քաղաքում անցկացված Մաթեմատիկայի 67-րդ միջազգային օլիմպիադայում, հայտնել է Հայաստանի Կրթության, գիտության, մշակույթի և սպորտի նախարարությունը։
Արծաթե մեդալի է արժանացել «Քվանտ» վարժարանի 10-րդ դասարանի աշակերտ Հայկ Մանուկյանը։
Բրոնզե մեդալներ են նվաճել «Քվանտ» վարժարանի 10-րդ աշակերտներ Տիգրան Հախեյանն ու Արեն Գրիգորյանը, Ա․ Շահինյանի անվան ֆիզմաթ մասնագիտացված դպրոցի 11-րդ դասարանցի Սարգիս Առաքելյանն ու 12-րդ դասարանցի Արսեն Մակարյանը։ Նույն դպրոցի 12-րդ դասարանցի Արման Ասատրյանն արժանացել է գովասանագրի։
Օլիմպիադային մասնակցել է 120 երկրի 666 աշակերտ։ Թիմային հաշվարկում Հայաստանն զբաղեցրել է 43-րդ տեղը։
2025 թվականին Ավստրալիայում անցկացված Մաթեմատիկայի 66-րդ միջազգային օլիմպիադայում Հայաստանի թիմը նվաճել էր երեք բրոնզե մեդալ և ստացել երեք գովասանագիր։
