Ուկրաինան և Ռուսաստանը Ստամբուլում կայացած բանակցությունների ժամանակ փոխանակվել են կարգավորման վերաբերյալ փաստաթղթերով և պատրաստվում են գերիների փոխանակման, տեղեկացրել է Ուկրաինայի նախագահ Վլադիմիր Զելենսկին, հայտնում է Svaboda-ն:
ՏԱՍՍ-ը հավելել է, որ հանդիպումը տևել է շուրջ մեկ ժամ: Բանակցությունների ընթացքում Ուկրաինան Ռուսաստանի պատվիրակներին է փոխանցել երկրի տարածքից դուրս բերված երեխաների ցանկ, որոնց վերադարձը պահանջում է։ Ուկրաինայի նախագահի գրասենյակի ղեկավար Անդրեյ Երմակը հայտարարել է, որ ցանկում ընդգրկված են «հարյուրավոր» ուկրաինացի երեխաներ, որոնց Ռուսաստանը «հարկադրաբար տեղափոխել կամ պահում է ժամանակավորապես օկուպացված տարածքներում»։
«Ուկրաինացի երեխաների վերադարձն արդար և տևական խաղաղության անբաժանելի մասն է, ինչպես նաև անկեղծության առաջին փորձությունը»,- ընդգծել է Երմակը։
Ուկրաինայի պաշտպանության նախարար Ռուստեմ Ումերովի խոսքով՝ կողմերը փոխանակելու են բոլոր ծանր հիվանդ ռազմագերիներին և 25 տարեկան անձանց: Նա մանրամասնել է, որ Մոսկվան ու Կիևը համաձայնել են նաև փոխանակակել զոհերի մարմինները:
Ռուսական կողմը դեռ մանրամասներ չի հայտնել:
Թուրքական լրատվամիջոցների հաղորդմամբ՝ Թուրքիայի ԱԳՆ պաշտոնական ներկայացուցիչ Օնջյու Քեչելին շեշտել է, որ բանակցություններն ավարտվել են «առանց բացասական արդյունքների»:
ԱՄՆ նախագահ Դոնալդ Թրամփը մայիսի 28-ին կարծիք էր հայտնել, որ Ուկրաինայում խաղաղ կարգավորման հետ կապված իրավիճակը պարզ կդառնա երկու շաբաթվա ընթացքում:
