Ֆրանսիայում հունիսի 22-28-ն ընկած շաբաթվա ընթացքում երկիրը համակած անոմալ շոգի հետևանքով մահացել է ավելի քան երկու հազար մարդ, TF1 հեռուստաալիքի եթերում հայտնել է առողջապահության նախարար Ստեֆանի Ռիստը:
«Տեղեկատվությունը հիմնված է մահվան վկայականների միայն 60%-ի վրա, ուստի վերջնական թիվը կարող է փոխվել»,- հայտարարել է Ռիստը: Նա նաև նշել է 45 տարեկանից բարձր քաղաքացիների շրջանում մահացության աճի մասին:
Անոմալ շոգը համակել է եվրոպական երկրների զգալի մասը: Ֆրանսիայում օդերևութաբանական ծառայությունը եղանակային վտանգի բարձրագույն մակարդակ է սահմանել 96 դեպարտամենտներից 72-ում:
Ջերմաստիճանը մոտեցել է 40 աստիճանին, իսկ որոշ վայրերում գերազանցել այն: Ծանր իրավիճակ է նաև Իսպանիայում, Պորտուգալիայում, Իտալիայում և Հունաստանում:
Նախկինում ևս, վերջին տարիներին անոմալ շոգի ալիքները բազմիցս պատել են Եվրոպան: 2019 թվականի ամռանը Ֆրանսիան վերապրել էր իր պատմության մեջ ամենամահաբեր ջերմային ալիքներից մեկը, որը խլեց ավելի քան 15 հազար մարդու կյանք: 2022 և 2023 թվականներին Հարավային Եվրոպայի երկրները նույնպես բախվել են ռեկորդային ջերմաստիճանների, ինչը հանգեցրել է հազարավոր վաղաժամ մահերի, անտառային հրդեհների և առողջապահական համակարգերի գերծանրաբեռնվածության:
Շոգի ներկայիս ալիքը դարձավ եվրոպական աշխարհամասի համար սաստկացող կլիմայական ռիսկերի հերթական հաստատումը:
