Հայ ծանրորդ Էմմա Պողոսյանն Ալբանիայում ընթացող ծանրամարտի Եվրոպայի երիտասարդների առաջնությունում ոսկե մեդալ է նվաճել՝ դառնալով 86 կգ քաշային կարգի հաղթող, հայտնում է Հայաստանի ծանրամարտի ֆեդերացիան:
Պոկում վարժությունում նա ունեցել է երեք հաջող մոտեցում` հաջորդաբար բարձրացնելով 100 կգ, 103 կգ, 105 կգ: Այս վարժությունում Պողոսյանը երրորդն էր: Հրում վարժությունում հայ մարզուհին բարձրացրել է 131 կգ և 136 կգ` սահմանելով Եվրոպայի ռեկորդ: Այս ձևում նա առաջինն էր: Երկամարտի 241 կգ արդյունքով Պողոսյանը դարձել է չեմպիոն:
Մրցաշարում չեմպիոնական տիտղոսներ էին նվաճել Հայաստանի ներկայացուցիչներ Տիգրան Կարապետյանը, Գառնիկ Չոլաքյանն ու Ալեքսանդրա Գրիգորյանը, Նարեկ Գրիգորյանն ու Նարեկ Մկրտչյանը նվաճել էին արծաթե մեդալներ, իսկ Մերի Միսակյանն ու Աննա Ամրոյանը՝ բրոնզե մեդալակիր:
