Արցախի հարցը չի կարող փակվել, քանի դեռ արցախցին զրկված է իր հայրենիքից, սրբություններից․ Շահրամանյան

Արցախի հարցը չի կարող փակվել, քանի դեռ արցախցին զրկված է իր հայրենիքից, գերեզմաններից, սրբություններից, Բռնի տեղահանության և պահանջատիրության օրը՝ սեպտեմբերի 19-ին, «Եռաբլուրում» լրագրողներին հայտնել է Արցախի Հանրապետության նախագահ Սամվել Շահրամանյանը։

Նա տեղեկացրել է, որ բռնի տեղահանումից ի վեր Արցախից Հայաստան չի տեղափոխվել շուրջ 66 մարմին, մինչդեռ այդ հարցով բռնի տեղահանումից ամիսներ հետո քննարկումներ են տեղի ունեցել նրանց տեղափոխելու և «Եռաբլուրում» հուղարկավորելու շուրջ։ Շահրամանյանը մանրամասնել է, որ հարցը 2023-ին քննարկել են ՀՀ իշխանությունների ու Ադրբեջանի ներկայացուցիչների հետ։

«Բռնի տեղահանումից հետո բարձրացրել էինք 2023-ին՝ վերջին ագրեսիայի հետևանքով զոհված և Արցախում հուղարկավորված մեր հայրենակիցների մարմինների տեղափոխման հարցը։ Նաև արտաշիրիմում իրականացնելու հարցն էինք բարձրացրել։ Նախնական համաձայնություն էինք ստացել, բայց, ցավոք, մինչև օրս այդ գործընթացը տեղի չի ունեցել»,- հավելել է Շահրամանյանը։

Այդ համատեքստում նա շեշտել է, որ հարցեր է բարձրացրել նաև գերիների վերադարձի, անհայտ կորածների ճակատագրերը պարզելու գործընթացների անհրաժեշտության մասին, բայց մինչ օրս այդ հարցով նույնպես լուծումներ չկան։ Շահրամանյանը շեշտել է, որ 2023-ին՝ Ադրբեջանի հարձակման օրերին, կապի մեջ էին ՀՀ իշխանությունների հետ։

«Փորձում էինք համաձայնեցնել մեր գործողությունները։ Տարբեր հարցերի շուրջ քննարկումներ ենք ունեցել՝ կապված հիմնականում հայտարարությունների, որոշումների հետ»,- հավելել է նախագահը։

Նա ընդգծել է, որ բռնի տեղահանումից հետո գերիների հարցով իր հետ ՀՀ իշխանությունները հանդիպում չեն ունեցել, բայց կապի մեջ էր ՀՀ ԱԱԾ նախկին տնօրեն Արմեն Աբազյանի հետ։

«Աբազյանը պատանդների, անհայտ կորածների և գերիների հարցով պետական հանձնաժողովի ղեկավարն էր։ Մենք իր միջոցով փորձում էինք որոշակի կարգավորումներ ունենալ»,- նշել է նա։

Շահրամանյանը նաև անդրադարձել է սեպտեմբերի 14-ին Ստեփանակերտում հայազգի Կարեն Ավանեսյանի ձերբակալությանը, ինչի մասին հայտնել էին ադրբեջանական ԶԼՄ-ները՝ նրան մեղադրելով «Ադրբեջանի նախագահ Իլհամ Ալիևի մասնակցությամբ միջոցառմանը կրակ բացելու փորձի մեջ»։ Շահրամանյանը նշել է, որ այդ անձն իսկապես հայ է և գտնվում է Ստեփանակերտում։

«Ավանեսյանը մի քանի տասնյակ մեր հայրենակիցների հետ Արցախում մնալու որոշում է կայացրել։ Ինչ վերաբերվում է դեպքին՝ այն չեմ կարող մեկնաբանել, քանի որ հստակ տեղեկություն չունեմ, բայց կարող եմ ասել, որ եթե նման դեպք տեղի է ունեցել, ապա այդ անձնավորությանը հասցրել են մի իրավիճակի, որ ստիպված նման քայլի է գնացել»,- եզրափակել է նա։

2023-ի սեպտեմբերի 19-ին Ադրբեջանը լայնամասշտաբ հարձակում էր սկսել Արցախի Հանրապետության դեմ։ Ռազմական ագրեսիայի հետևանքով, ՀՀ քննչական կոմիտեի վերջին տվյալներով, զոհվել էր ավելի քան 200, վիրավորվել՝ ավելի քան 300 մարդ, գերեվարվել են 17-ը, խոշտանգվել՝ 14-ը, անհետ կորել՝ 42-ը։ Վերջին տվյալներով՝ Արցախից բռնի տեղահանված 100 632 քաղաքացի էր ժամանել ՀՀ։

Կարդացեք նաև՝