Բաքվի բանտում գտնվող Արցախի պետնախար Ռուբեն Վարդանյանը պապիկ է դարձել, բայց նրա ընտանիքը հնարավորություն չունի նրան բարի լուրը հայտնելու, GB News-ին տված հարցազրույցում ասել է Վարդանյանի որդին՝ Դավիթը։
Դավիթը շեշտել է, որ իր դուստրը ծնվել է Վարդանյանի գերեվարումից հետո։
«Հայրս պապիկ է դարձել, բայց նույնիսկ թոռնիկին չի տեսել։ Սա շատ դժվար է մեր ամբողջ ընտանիքի համար»,- ասել է նա։
Ընտանիքը նրա հետ միայն երբեմն է կարողանում կապ հաստատել հեռախոսով, սակայն, Ադրբեջանում Կարմիր խաչի միջազգային կոմիտեի գրասենյակների փակվելուց հետո է՛լ ավելի է բարդացել հաղորդակցությունը։
Մարդու իրավունքների միջազգային պաշտպանները շարունակում են ուշադրություն հրավիրել Վարդանյանի իրավունքների խախտման, ինչպես նաև հայ բանտարկյալների ճակատագրի վրա։
«Մենք հույս ունենք, որ արդարությունը կհաղթանակի, և հայրս ոչ միայն կկարողանա իմանալ իր թոռնուհու մասին, այլև վերջապես կտեսնի նրան»,- ավելացրել է նա։
Մայիսին Դավիթ Վարդանյանը դիմել էր ԱՄՆ նախագահ Դոնալդ Թրամփին՝ հոր ազատ արձակմանը աջակցելու հույսով։ Վարդանյանն ասել էր, որ 110 տարի առաջ՝ Վուդրո Վիլսոնի նախագահության օրոք, Միացյալ Նահանգները օգնել էր ցեղասպանությունից թաքնվող հայերին, և այսօր Թրամփի վարչակազմը պետք է նույնը անի։
