Իրանն Իսրայելի գործողությունների մեջ Ադրբեջանի ներգրավվածության փաստեր չունի, հայտնել է ՀՀ-ում Իրանի դեսպան Մեհդի Սոբհանին՝ ի պատասխան Armenia Today-ի հարցը, ըստ որի՝ ԶԼՄ-ներում և սոցցանցերում կան տեղեկություններ, որ Իրանի դեմ Իսրայելի գործողության մեջ կա Ադրբեջանի ներգրավվածությունը։
Հունիսի 17-ին տեղի ունեցած ասուլիսի ժամանակ դեսպանը նշել է, որ տարածաշրջանի երկրները համեմատաբար լավ դիրքորոշումներ են որդեգրել հակամարտության հետ կապված։
«Ադրբեջանը Հանրապետությունը նույնպես իր դիրքորոշումը հայտնել է այդ մասին։ Մենք չենք կարող մամուլում զետեղված ենթադրությունների ու հրապարակված նյութերի հիման վրա կարծիք հայտնել»,- ընդգծել է դեսպանը՝ հավելելով, որ Իրանը հետևում է տարածաշրջանում տեղի ունեցող զարգացումներին։
Ասուլիսի ժամանակ մեկնաբանելով իրանա-իսրայելական լարվածության ֆոնին «Զանգեզուրի միջանցքի» վերաբերյալ փորձագիտական շրջանակների մտահոգությունների մասին Armenia Today-ի հարցը՝ Սոբհանին հավաստիացրել է, որ Իրանը երբեք չի փոխի իր դիրքորոշումն իր համար սահմանած կարմիր գծերի վերաբերյալ:
«Կարմիր գծերը մեր կենսական գծերն են։ Իր կարմիր գծերի վերաբերյալ Իրանի դիրքորոշումները երբեք չեն փոխվի։ Կարծում եմ՝ տարածաշրջանի երկրները ցանկանում են, որ տարածաշրջանում լարվածությունը չսրվի, որովհետև դա բխում է բոլորի շահերից»,- հավաստիացրել է դիվանագետը։
Հունիսի 10-ին Իրանի գերագույն առաջնորդի միջազգային հարցերով խորհրդական Ալի Աքբար Վելայաթին հայտարարել էր, որ հենց Իրանն է խոչընդոտել, այսպես կոչված, «Զանգեզուրի միջանցք» նախագծի իրականացումը։
Յոթերորդ օրն է՝ շարունակվում են ռազմական գործողությունները Իրանի և Իսրայելի միջև: Առաջին հարվածը հասցրել էին Իսրայելի ռազմաօդային ուժերը հունիսի 13-ի գիշերը՝ թիրախավորելով Իրանի ռազմական և արդյունաբերական օբյեկտները, որից հետո կողմերն ամեն օր փոխանակվում են հրթիռային հարվածներով, որոնք մարդկային զոհերի ու ավերածությունների պատճառ են դարձել։ Հունիսի 13-ին Ադրբեջանի նախագահի օգնական Հիքմեթ Հաջիևը «ապատեղեկատվություն» էր անվանել Իրանի դեմ Իսրայելի գործողություններին էթնիկ ադրբեջանցիների մասնակցության մասին հաղորդագրությունները:
ՀՀ ԱԳՆ-ն դատապարտել էր Իսրայելի հարձակումն Իրանի վրա։
Աննա Բադալյան
