Հայաստանը չի պլանավորում կրճատել փոխգործակցությունն Անկախ պետությունների համագործակցության (ԱՊՀ) հետ կամ դուրս գալ կազմակերպության կազմից, Известия պարբերականին հայտնել է ԱՊՀ գլխավոր քարտուղար Սերգեյ Լեբեդևը։
«Հայաստանի և ԱՊՀ-ի համագործակցության կրճատում չի նախատեսվում։ Երևանը շատ ուղղություններով հետաքրքրված է ԱՊՀ-ի հետ շփումներով. խոսքը վերաբերում է թե՛ տնտեսական ոլորտին, թե՛, իհարկե, քաղաքական ու հումանիտար բնագավառներին»,- նշել է Լեբեդևը։
ԱՊՀ գլխավոր քարտուղարն ընդգծել է, որ ի տարբերություն ԱՊՀ հարթակի՝ ռազմաքաղաքական ոլորտում և Հավաքական անվտանգության պայմանագրի կազմակերպության (ՀԱՊԿ) հետ հարաբերություններում հայկական կողմն ունի որոշակի «տարակուսանքներ և բարդություններ»։
«Մնացած առումներով, ինչ վերաբերում է ԱՊՀ-ին, այստեղ հարցեր չկան»,- հավելել է նա։
Վարչապետ Նիկոլ Փաշինյանն ապրիլի 2-ի ճեպազրույցի ժամանակ հայտնել էր, որ ՀԱՊԿ-ի թեման քննարկել են ՌԴ նախագահ Վլադիմիր Պուտինի հետ ապրիլի 1-ին կայացած հանդիպման ժամանակ։ Նա հավելել էր, որ ՀԱՊԿ-ի վերաբերյալ Հայաստանի դիրքորոշման մեջ փոփոխություններ ակնկալելը, մասնավորապես՝ ակտիվ մասնակցությանը վերադառնալու ուղղությամբ, «այս պահին անիրատեսական է»։
