ԱՄՆ նախագահ Դոնալդ Թրամփը հայտարարել է Իրանի էներգետիկ ենթակառուցվածքների դեմ ռազմական հարվածները 5 օրով հետաձգելու մասին։
Truth Social-ում գրառման մեջ նա նշել է, որ ԱՄՆ-ն և Իրանը վերջին երկու օրում «շատ լավ և արդյունավետ» բանակցություններ են վարել Մերձավոր Արևելքում թշնամանքի լիակատար կարգավորման շուրջ։
Թրամփի խոսքով՝ բանակցությունները «խորքային, մանրամասն և կառուցողական» են և կշարունակվեն ամբողջ շաբաթվա ընթացքում։ Նրա հայտարարության համաձայն՝ ռազմական գործողությունների հետաձգումը պայմանավորված է ընթացող հանդիպումների արդյունքներով։
«Ես հանձնարարել եմ պատերազմի նախարարությանը հինգ օրով հետաձգել Իրանի էլեկտրակայանների և էներգետիկ ենթակառուցվածքների դեմ բոլոր հարվածները»,- գրել է նա։
Fars գործակալությունը, հղում անելով իր աղբյուրին, ավելի ուշ գրել է, որ Իրանն ԱՄՆ-ի հետ ո՛չ ուղիղ, ո՛չ միջնորդների միջոցով կապ չի ունեցել։
Ըստ իրանական կողմի աղբյուրի՝ Թրամփի հետ համաձայնություն չկա, նա պարզապես «հետ է կանգնել հարվածներից, երբ լսել է, որ Մերձավոր Արևելքում Իրանի համար թիրախներ են դառնալու ամերիկյան բոլոր էլեկտրակայանները»։
Սպիտակ տան ղեկավարը Fox Business հեռուստաալիքի եթերում հավելել է, որ ԱՄՆ-ի և Իրանի միջև գործարքը կարող է ձեռք բերվել հինգ օրվա ընթացքում «կամ նույնիսկ ավելի արագ» բանակցությունների «արդյունավետության» շնորհիվ: Նրա խոսքով՝ Իրանը «շատ է ցանկանում գործարք կնքել»: ԱՄՆ նախագահը պատասխանել է նաև Իրանի պետական հեռուստատեսության այն հայտարարությանը, թե Թեհրանի և Վաշինգտոնի միջև բանակցություններ չեն կայացել՝ ասելով, որ դրանք տեղի են ունեցել անցած գիշեր:
ԱՄՆ-ն ու Իսրայելը փետրվարի 28-ին լայնածավալ ռազմական գործողություն էին սկսել Իրանի դեմ: Գործողության արդյունքում զոհվել էին Իրանի բարձրաստիճան զինվորականներ և պաշտոնյաներ, այդ թվում՝ Իրանի գերագույն հոգևոր առաջնորդ Ալի Խամենեին:
Իրանն ի պատասխան՝ հարվածներ էր հասցրել տարածաշրջանի մի շարք երկրներում ԱՄՆ-ի և Իսրայելի թիրախներին: Հարվածներ են հասցվել Բահրեյնում, Հորդանանում, Կատարում, Քուվեյթում, Արաբական Միացյալ Էմիրություններում և Սաուդյան Արաբիայում գտնվող ամերիկյան ռազմակայաններին ու դիվանագիտական ներկայացուցչություններին:
