«Ուժեղ Հայաստան» կուսակցության քաղխորհրդի անդամ Նարեկ Կարապետյանը հայտարարել է, որ Հայաստանի ջրային և էներգետիկ ոլորտներում ստեղծված իրավիճակը ոչ էֆեկտիվ կառավարման և հանրային քաղաքականության բացակայության արդյունք է:
«Մենք հասել ենք նրան, որ 21-րդ դարում Երևան քաղաքում մեկ շիշ ջուրն անհասանելի է լինելու հարյուր հազարավոր բնակիչների համար»,- ասել է նա՝ մեկնաբանելով «Վեոլիա Ջուր» ընկերության կողմից ջրամատակարարման ժամերը կրճատելու որոշումը:
Ընկերությունն ավելի վաղ հայտարարել էր, որ մայիսի 1-ից սեպտեմբերի 16-ն ընկած ժամանակահատվածում ջուրը որոշ հասցեներում կմատակարարվի առավոտյան ժամը 07:00-ից մինչև կեսգիշեր՝ օրական 17 ժամ տևողությամբ:
Ընդգծելով, որ ջուրն անհրաժեշտություն է, այլ ոչ թե ճոխություն, Կարապետյանը շեշտել է խնդիրը պատշաճ կառավարման միջոցով լուծելու անհրաժեշտությունը: Կարապետյանի խոսքով՝ Հայաստանը տարեկան մեկ շնչի հաշվով ստանում է 3300 խորանարդ մետր ջուր, ինչը կրկնակի ավելի է, քան համաշխարհային միջին ցուցանիշը՝ 1800 խորանարդ մետրը: Հայաստանում ջրի կորուստը կազմում է 65%, ինչը նշանակում է, որ մատակարարվող ջրի միայն 35%-ն է հասնում սպառողներին:
Ավելին, կուսակցության ներկայացուցչի խոսքով՝ Հայաստանի տարեկան վերականգնվող ջրային պաշարները կազմում են 5 մլրդ խորանարդ մետր, որից օգտագործվում է միայն 170 մլն խորանարդ մետրը:
«Տարածաշրջանի ամենաջրառատ երկրներից մեկը չի կարող բախվել այս խնդրին: Ջուր կա, կառավարում չկա»,- ընդգծել է նա:
Կարապետյանը նաև հայտնել է, որ վերջին չորս ամսվա ընթացքում, նախորդ տարվա համեմատ, Հայաստանում էլեկտրաէներգիայի անջատումների թիվն աճել է 40%-ով:
«Էներգետիկ ոլորտում տոտալ կոլապս ունենք, և սխալ արտաքին քաղաքականության արդյունքում վտանգում ենք նաև գազամատակարարումը՝ երկու հարևան երկրների հետ հարաբերությունները վատացնելու միջոցով»,- հավելել է նա:
Կարապետյանը, որպես լուծում, մատնանշել է կորուստները կրճատելու անհրաժեշտությունը՝ հիշեցնելով, որ նախկինում էլեկտրաէներգիայի ոլորտում կորուստները 20-30%-ից կրճատել էին մինչև 6%: Նա նաև ընդգծել է կորուստների կրճատման հարցը լուծելու համար համապատասխան պաշտոնյաներ նշանակելու անհրաժեշտությունը:
Նա, որպես ստեղծված իրավիճակի պատճառներ, նշել է համակարգված ներդրումների, ճիշտ կառավարման և պետության խիստ մոտեցման բացակայությունը: Կարապետյանը նաև նշել է, որ Երևանի ամբողջ կենտրոնը սնուցվում է տասնամյակներ առաջ կառուցված ջրամբարներից, և դրանք տարիներ շարունակ չեն վերանորոգվել։
Մեկնաբանելով կառավարության կողմից կենսաթոշակների բարձրացման որոշումը՝ կուսակցության ներկայացուցիչը կարծիք է հայտնել, որ սա ընդդիմության գործունեության և իշխանությունների կողմից «վտանգի զգացողության» արդյունք է։ Նա հիշեցրել է, որ պետական բյուջեով նախատեսված չէր կենսաթոշակների բարձրացում։
«Մենք սա համարում ենք հաղթանակ։ Ուրախ ենք այս փաստի համար, որ վերջապես այսքան տարի հետո թոշակի այսպիսի բարձրացում տեղի ունեցավ»,- ասել է նա՝ հույս հայտնելով, որ պաշտոնյաների պարգևավճարները զուգահեռաբար կկրճատվեն։
Ավելի վաղ իշխանությունները հայտարարել էին, որ ապրիլի 1-ից նվազագույն կենսաթոշակը կբարձրացվի 10 000 դրամով՝ հասնելով 46 000 դրամի։ ՀՀ վարչապետ Նիկոլ Փաշինյանի խոսքով՝ համեմատաբար ցածր կենսաթոշակը կբարձրանա 10 000 դրամով, իսկ ավելի բարձրները՝ ավելի փոքր չափով։
