«Տաշիր» ընկերությունների խմբի ղեկավար Սամվել Կարապետյանի աջակցության և նրա կալանքի դեմ հանրահավաքն ու երթն արտոնված են, հայտնել է Կարապետյանի պաշտպանության խորհուրդը։
Գործարարի փաստաբանները պարզաբանել են, որ ամեն ինչ համաձայնեցված է Երևանի քաղաքապետարանի և Ներքին գործերի նախարարության հետ։
Երթը կսկսվի այսօր՝ ժամը 18:00-ին, Դիանա Աբգարի անվան այգում և կավարտվի «Երևան-Կենտրոն» քրեակատարողական հիմնարկի մոտ, որտեղ պահվում է գործարարը։
Հուլիսի 1-ին «Տաշիր» ընկերությունների խմբի առաջին փոխնախագահ Նարեկ Կարապետյանը հայտարարել էր Երևանում երթի մասին՝ երկրում տիրող անարդարության և անօրինականության դեմ բողոքի ակցիայի շրջանակներում:
Հունիսի 19-ին դատարանը երկու ամսով կալանավորել էր «Տաշիր» ընկերությունների խմբի նախագահ Սամվել Կարապետյանին իշխանությունը զավթելու կոչեր անելու մեղադրանքով, երբ նա քննադատել էր Ամենայն Հայոց կաթողիկոսի և հոգևորականների դեմ Հայաստանի իշխանությունների արշավը: Փաշինյանը խիստ էր արձագանքել Կարապետյանի հայտարարությանը: Գործարարը չի ընդունում մեղադրանքը և մտադիր է բողոքարկել այն եվրոպական դատարանում: Հուլիսի 3-ին ՔԿ խոսնակը տեղեկացրել էր, որ քրեական վարույթով 2 անձ է կալանավորվել, և դատարանը քննում է վերոնշյալ մյուս 2 անձի նկատմամբ կալանքը որպես խափանման միջոց կիրառելու միջնորդությունը։
Armenia Today-ը հուլիսի 2-ին հայտնել էր, որ իրավապահները խուզարկություններ են իրականացնում «Տաշիր գրուպի» գլխավոր գրասենյակում, ինչպես ՔԿ-ից Armenia Today-ին մանրամասնել էին, դրանց հիմքում «առանձնապես խոշոր չափերով փողերի լվացման և առանձնապես խոշոր չափերով հարկերը, տուրքերը կամ այլ վճարներ չվճարելու հատկանիշներով նախաձեռնված քրեական վարույթի նախաքննությունն էր»։
Կարդացեք նաև՝
Ինչո՞ւ են Սամվել Կարապետյանին կալանավորել. եկեղեցի, քաղաքականություն, ներդրումային ռիսկեր
«Չուլանացված» եկեղեցիներից մինչև կաթողիկոսի փոփոխության կոչ․ ի՞նչ օրակարգ է փորձում պարտադրել Փաշինյանը
