Բանկային զեղծարարություններից տուժած քաղաքացիները հայտարարել են, որ վարկային պարտավորությունների սառեցման վերաբերյալ Կենտրոնական բանկի նախագահ Մարտին Գալստյանի հայտարարությունն իրականությանը չի համապատասխանում։ Նրանք այդ մասին հայտարարել են ԿԲ-ի դիմաց մայիսի 13-ի ակցիայի ընթացքում։
«Մինչ օրս քաղաքացիները վարկային ապօրինի պարտավորություններ ունեն, որոնք չեն սառեցվել։ Չի բացառվում, որ ԿԲ նախագահը միտումնավոր է քաղաքացիներին ապակողմնորոշում»,- լրագրողներին ասել է «Հանրային վերահսկողություն» ՀԿ նախագահ, իրավապաշպան Մհեր Կարագոզյանը՝ տեղեկացնելով, որ ԿԲ-ի դիմաց ակցիայից հետո պատրաստվում են գնալ Հակակոռուպցիոն կոմիտե։
Կարագյոզյանը ԿԲ-ի գործելաոճը որակել է «հովանավորչություն» բանկերի նկատմամբ՝ շեշտելով, որ երկրի հիմնական դրամավարկային մարմինը պաշտպանում է մասնավոր բանկերի շահերը, ինչը «պետք է գրավի Հակակոռուպցիոն կոմիտեի ուշադրությունը»։ Նա տեղեկացրել է, որ իրենց կասկածները կներկայացնեն Հակակոռուպցիոն կոմիտեին։
«Հակակոռուպցիոն կոմիտեից պահանջելու ենք ուսումնասիրել ԿԲ նախագահի հայտարարությունները, պարզել՝ նա արդյոք շահագրգռվածություն կամ կաշկանդվածություն չի՞ ունեցել։ Ավելին՝ բանկերի կողմից պահանջները գնալով սրվում են՝ քաղաքացիներին առնչվող նոտարական հրամանաններ են արձակվում։ Քաղաքացիներին թալանում են, ինչը հոգեբանական բռնություն է»,- ավելացրել է նա։
Կարագյոզյանն իրատեսական չի համարել Գալստյանի այն հայտարարությունը, թե ԿԲ-ն կարող է առանձին-առանձին ուսումնասիրել զեղծարարությունից տուժածներին առնչվող դեպքերը՝ հաշվի առնելով ԿԲ աշխատակիցների և տուժածների թիվը, որն անցնում է 10 հազարը։
Ակցիայի մասնակիցներից մեկը, որը ևս տուժել է զեղծարարությունից, Armenia Today-ին հայտնել է, որ ID բանկում իր անունով 2024-ի հոկտեմբերին ավելի քան 500 հազար դրամ վարկ է ձևակերպվել։
«Կրում եմ ֆինանսական կորուստներ՝ չգիտեմ ում և ինչի համար։ Առանց իմ իմացության 550 հազարի ռոքեթ լայն է ձևակերպվել, միայն հաջորդ օրն է էլեկտրոնային հասցեիս ծանուցում եկել։ Բանկին խնդրել եմ կասեցնել, բայց ոչինչ չարեցին»,- ասել է քաղաքացին։
Նույն բանկի հաճախորդ մի քաղաքացի էլ նշել է, որ զեղծարարներն իր անունից դիմում են գրել ու 40 րոպեում 400 000 դրամի վարկային սահմանաչափը դարձրել ավելի քան 3 մլն դրամ։
«Ինձ ասացին՝ ձեր հեռախոսը Redmi է, բայց գործարքն իրականացվել է Iphone-ով, առաջարկեցին 12% տոկոսադրույքով փակել վարկը, բայց հրաժարվեցի»,- մանրամասնել է քաղաքացին։
Մեկ այլ քաղաքացի՝ Նորայր Բախտամյանը, Armenia Today-ին պատմել է, որ մարտին անծանոթ հեռախոսազանգ է ստացել, ինչից հետո բանկային հավելվածներն անհետացել են։
«Հեռախոսազանգով ասացին, որ «Վիվայի» կապերն են ստուգում։ Հետո կապ հաստատեցի «Վիվայի» հետ, որտեղից ասացին, թե որևէ կապ չեն ստուգել, և դա զեղծարարությունների ձեռքի գործն է։ Զանգահարեցի ոստիկանություն, հետո՝ Converse բանկ, որտեղից տեսան, որ իմ անունից զեղծարարները 1 մլն դրամի վարկ են ձևակերպվել»,- ասել է Բախտամյանը։
Քաղաքացիները նաև նշել են, որ կան բանկեր, որոնք ընդառաջել են իրենց՝ սառեցնելով պարտավորությունները, բայց մեծամասնությունը չի զիջել։
Զեղծարարություններից տուժածներն ավելի քան 2 ամիս է՝ ակցիաների միջոցով պահանջում են սառեցնել զեղծարարության հետևանքով առաջացած վարկային պարտավորությունները։ ԿԲ նախագահը մարտին հայտարարել էր, որ վարկային խաբեությունների բոլոր դեպքերն ուսումնասիրելու են։ Մայիսի 5-ին նրանք ակցիա էին իրականացրել ԿԲ-ի ու ՄԻՊ-ի դիմաց՝ ԿԲ-ին մեղադրելով «հանցավոր լռության» մեջ։ Մայիսի 6-ին Գալստյանը տեղեկացրել էր, որ իր ղեկավարած կառույցը բանկերին հորդորել է սառեցնել զեղծարարությունների հետևանքով հաստատված գործարքներից բխող վարկային պարտավորությունները։
