Վաղարշապատի ընտրություններում ընտրակաշառքի գործով 10 անձ է ձերբակալվել, այդ թվում՝ Արմավիրի մարզպետի նախկին տեղակալը, Armenia Today-ին հայտնել են Հակակոռուպցիոն կոմիտեից՝ անդրադառնալով «Հայրենիք» կուսակցության պատասխանատու Արամ Քոչարյանի և կուսակցության գլխավոր քարտուղար Խաչիկ Գալստյանի ձերբակալությանը։
Նշվում է, որ Քոչարյանին և Գալստյանին ձերբակալել էին նախօրեին, իսկ 8 այլ անձի՝ այդ թվում՝ Արմավիրի մարզպետի նախկին տեղակալին (անունը չի նշվում-խմբ․), ձերբակալել էին օրերս։ Կոմիտեից հավելել են, որ 8 ձերբակալվածից մեկի նկատմամբ խափանման միջոց է կիրառվել կալանքը, երեքի նկատմամբ՝ տնային կալանքը։ Կոմիտեից նաև հավելել են, որ կուսակցության պատասխանատուին և գլխավոր քարտուղարին կալանավորելու միջնորդություններ են ներկայացվել դատարան։
Կոմիտեից տեղեկացրել են, որ բոլորին ձերբակալել են Վաղարշապատում նոյեմբերի 16-ին համամասնական ընտրակարգով ավագանու ընտրություններին «Հայրենիք» կուսակցության պատասխանատու անձանց կողմից իրենց օգտին քվեարկելու դիմաց ընտրակաշառք տալու և նույն համայնքի բնակիչների կողմից ընտրակաշառք ստանալու դեպքերի առթիվ նախաձեռնված քրեական վարույթի շրջանակում։
Վաղարշապատում տեղի ունեցած ընտրություններում առավելագույն ձայներն ստացել էր «Քաղաքացիական պայմանագիր» կուսակցությունը։ Ներքին գործերի նախարարությունը ենթադրյալ իրավախախտումների վերաբերյալ ստացել էր 10 ահազանգ։ Դիտորդները մի շարք ընտրախախտումներ էին արձանագրել։
«Հայրենիք» կուսակցության նախագահ, Ազգային անվտանգության ծառայության նախկին տնօրեն Արթուր Վանեցյանը դեկտեմբերի 28-ին հայտնել էր, որ Հակակոռուպցիոն կոմիտեի քննիչները խուզարկում են կուսակցության գլխավոր քարտուղար Խաչիկ Գալստյանի բնակարանը, ավելի ուշ նրան և Քոչարյանին ձերբակալել էին։
