Արմավիրի մարզի Արգինա գյուղում գայլերի ոհմակը հոշոտել է բազմանդամ ընտանիքին և մի քանի գյուղացու պատկանող 28 ոչխար, տեղեկացնում է Shamshyan.com-ը։
Ըստ կայքի՝ դեպքը տեղի է ունեցել նոյեմբերի 22-ին՝ ժամը 6:30-7:00-ն ընկած ժամանակահատվածում։ Գյուղի 57-ամյա բնակիչ Հարություն Ասատրյանն իր և հարևանի ոչխարներին արոտավայր տանելիս ականատես է դարձել գայլերի հարձակմանը։
Կայքի տվյալներով՝ ընդհանուր առմամբ՝ 28 ոչխար է հոշոտվել, ևս 15-ն անհետ կորել են։ Ասատրյանի խնամքի տակ էին 208 ոչխար, որոնց մի մասը գնել էր պարտքով։
Գյուղի բնակիչները լրատվականին պատմել են, որ նմանատիպ միջադեպեր տեղի են ունեցել նաև նախկինում, սակայն «28 ոչխարի վրա հարձակումը գյուղի պատմության մեջ ամենամեծն էր», ընդգծելով, որ տուժած ընտանիքն «ապրուստը վաստակում է ծանր աշխատանքով, և ոչխարների մեծ մասը շուտով պետք է մայրանային»։
Shamshyan.com-ը նշում է, որ միջադեպի մասին արդեն տեղեկացրել են վարչական շրջանի ղեկավարին և Բաղրամյանի ոստիկանապետին, ինչից հետո խնդրանքով կդիմեն ՀՀ վարչապետ Նիկոլ Փաշինյանին, Արմավիրի մարզպետ Վահրամ Խաչատրյանին, որ իրենց օգնեն։
