Երևանի «Շտապբուժօգնություն» ՓԲԸ-ի տնօրեն Ռուբեն Գրիգորյանն Armenia Today-ին մանրամասներ է ներկայացրել փետրվարի 24-ին կանչով Լեոյի փողոց ժամանած շտապօգնության բժիշկներին ծեծի ենթարկելու դեպքից։
Գրիգորյանի խոսքով՝ այն հասցեն, որտեղից կանչ է գրանցվել, ենթակայանից 400-500 մետր հեռավորության վրա է։
«Բժիշկները ժամանակին հասել են դեպքի վայր, սակայն, ինչպես հետո է պարզվել, միջադեպի մասնակիցները թմրանյութի ազդեցության տակ էին, և սկսել են անվայել բառերով խոսել բժիշկների հետ։ Հայհոյախառն են խոսել և արդեն պարզ է, թե ինչ իրավիճակ է ստեղծվել»,- մանրամասնել է Գրիգորյանը։
Նա ընդգծել է, որ բժիշկը ֆիզիկապես ուժեղ, նորմալ և հավասարակշռված մարդ է։
«Բժիշկը միջադեպի հետևանքով վնասվածքներ չի ստացել, ուժեղ տղա է, իրեն ծեծելը դժվար է։ Իր մասին դրական կարծիքներ կան»,- նշել է տնօրենը։
Գրիգորյանը, հիշելով նաև նախկինում բժիշկներին բռնության ենթարկելու դեպքերը, ասել է, որ կաչերի ժամանակ նաև լեզվակռիվներ են լինում։
«Նմանօրինակ դեպքերը կանխելու նպատակով պարտադիր է օրենքը փոխել և խիստ պատիժ սահմանել, ինչը թույլ կտա հետագայում կանխել բժշկի վրա ձեռք բարձրացնելու դեպքերը: Լեզվակռիվներն ու բանավեճերը կանխելու համար պետք է օրենքը խստացնել, որպեսզի բանը չհասնի ձեռքերին և բժիշկներ ծեծելուն»,- եզրափակել է տնօրենը։
Առողջապահության նախարար Անահիտ Ավանեսյանը տեղեկացրել էր, որ փետրվարի 24-ին շտապօգնության բժիշկներ են բռնության ենթարկվել։ ՆԳՆ-ն ավելի ուշ հայտնել էր բժիշկներին ծեծի ենթարկած Արմավիր քաղաքի 37-ամյա և Մեծամոր քաղաքի 20-ամյա բնակիչների ձերբակալության մասին։ Իրավապահները ոչ սթափ վիճակում բժիշկներին ծեծի ենթարկածների մոտ թմրանյութ էին հայտնաբերել։
Փետրվարի 21-ին ՀՀ ՆԳՆ-ն տեղեկացրել էր, որ Շիրակի մարզի Ազատան գյուղում տարեց տղամարդու որդին մոխրամանով հարվածել էր հորն օգնություն ցույց տվող բուժաշխատողին։ Ոստիկանները ձերբակալել էին բժշկին բռնության ենթարկած 44-ամյա տղամարդուն։
2023-ի փետրվարին «Կապան» ԲԿ բուժօգնության տեղափոխված հիվանդներից մեկի հարազատները ծեծել էին հերթապահ բժշկին և շտապօգնության մեքենայի վարորդին։
