«Մեր ձևով» շարժման անդամ Շիրազ Մանուկյանցն Armenia Today-ի «Խոսում ենք գլխավորի մասին» հաղորդման շրջանակներում անդրադարձել է երիտասարդության խնդիրներին, կրթական բացերին և աշխատանքի տեղավորման դժվարություններին։ Նրա խոսքով՝ շարժումը նախատեսում է ստանձնել կարիերային կենտրոնների գործառույթ՝ օգնելով ուսանողներին և երիտասարդ մասնագետներին գտնել աշխատանք և ձեռք բերել անհրաժեշտ հմտություններ։
«Այսօրվա երիտասարդությունը մեր երկրի գեներացնող ուժն է և վաղվա իրագործողը։ Եթե բաց քննարկումներ չլինեն, պետությունը չի կարող ամբողջացնել երիտասարդի միտքը և ճիշտ ուղղությամբ առաջնորդել նրան»,- նշել է Մանուկյանցը։
Նա շեշտել է, որ երիտասարդության ձայնը պետք է հնչի ոչ միայն քաղաքական, այլև համայնքային մակարդակում:
«Համայնքներին կից պետք է կազմակերպվեն երիտասարդների քննարկումներ, որտեղ կարելի է գտնել իրական լուծումներ՝ նոր գաղափարների և նախաձեռնությունների միջոցով»,- մանրամասնել է «Մեր ձևով» շարժման ներկայացուցիչը:
Մանուկյանցը նկատել է, որ իշխանությունները չեն իրականացնում բավարար երկխոսություն երիտասարդների հետ և տեղյակ չեն նրանց կարիքներից։ Նրա խոսքով՝ կրթական համակարգում կան ծրագրային բացեր, իսկ ուսանողներին անհրաժեշտ է հնարավորություն տալ մասնագիտական փորձ ձեռք բերելու դեռ ուսման ընթացքում։
«Պետությունը պետք է համագործակցի մասնավորի հետ՝ ստեղծելով ծրագրեր, որտեղ ուսանողները կարող են կիրառել իրենց գիտելիքները, ձեռք բերել հմտություններ և մնալ Հայաստանում»,- ասել է նա։
Հարցազրույցում Մանուկյանցը խոսել է նաև մարզերում բնակվող երիտասարդներին նվիրված ծրագրերի սակավության խնդրի մասին՝ նշելով, որ նրանց գաղափարները և նախաձեռնությունները հաճախ մնում են առանց պետական աջակցության։
Մանրամասն՝ Armenia Today-ի տեսանյութում:
Կարդացեք նաև՝
«Պայքար՝ մեր ձևով». Երևանում հավաք ու երթ է անցկացվել՝ ի աջակցություն Սամվել Կարապետյանի
«Լսել մարդկանց և կիսել գաղափարները»․ կայացավ Սամվել Կարապետյանի «Մեր ձևով» շարժման շնորհանդեսը
«Բեկումնային պահ քաղաքի համար». Գյումրիում բացվել է «Մեր ձևով» շարժման գրասենյակը
