«Մաքուր պոպուլիզմ»․ իսրայելցի քաղաքագետը Նեթանյահուի՝ Հայոց ցեղասպանությունը ճանաչելու հայտարարության մասին

Իսրայելի վարչապետ Բենյամին Նեթանյահուի՝ Հայոց ցեղասպանության «ճանաչման» մասին հայտարարությունը «մաքուր պոպուլիզմ է և ուրիշ ոչինչ», Armenia Today-ին ասաց Իսրայելի հայ մշակույթի և կրթության «Նոյյան Տապան» կենտրոնի մամուլի խոսնակ, քաղաքագետ Մեննի Կորսունսկին։

Փորձագետի խոսքով՝ Նեթանյահուի խոսքերը հիմնականում ուղղված էին Թուրքիայի նախագահ Ռեջեփ Թայիփ Էրդողանին, ով վերջերս աչքի է ընկնում Իսրայելի դեմ ուղղված հռետորաբանությամբ։

Նրա խոսքով՝ այդ հայտարարությունը Նեթանյահուն մտադիր էր Էրդողանին ցույց տալ, թե «որտեղ են ձմեռում խեցգետինները»։

«Իսրայելը դեռևս ժողովրդավարական պետություն է, և Հայոց ցեղասպանության պաշտոնական ճանաչման համար որոշում պետք է կայացնի երկրի կառավարությունը կամ առնվազն խորհրդարանը, այլ ոչ թե մեկ անձ, նույնիսկ եթե նա պետության ղեկավարն է։ Ավելին, ձևաչափն ինքնին հարմար չէր նման ողբերգությունը ճանաչելու համար»,- նշեց Կորսունսկին։

Նա համամիտ չէ հնչող կարծիքներին, թե հնարավոր է՝ երկրի նախագահը պահի տրամաբանությամբ կամ պատահմամբ է արել նման արտահայտություն։

«Նեթանյահուի նման մարդու մոտ պատահականություններ չեն լինում։ Դրանք Էրդողանի համար նախատեսված խոսքեր էին, որը վերջին շրջանում հակաիսրայելական քաղաքականություն է վարում»,- մեկնաբանեց նա։

Քաղաքագետի խոսքով՝ այս հայտարարությանը, ամենայն հավանականությամբ, ոչ մի գործընթաց չի հետևի։

«Կարծում եմ՝ հաշվի առնելով այն իրավիճակը, որում հայտնվել է Իսրայելը, ոչինչ չի փոխվի, ավելին, չպետք է մոռանանք, որ Իսրայելի կառավարությունը կազմված է ազգայնականներից, ովքեր պատրաստ չեն լինի այս ողբերգության պաշտոնական ճանաչմանը»,- պարզաբանեց նա։

Նա նաև մեկնաբանեց Իսրայելի ժողովրդի վերաբերմունքը երկրի իշխանությունների կողմից Հայոց ցեղասպանությունը չճանաչելու վերաբերյալ։

«Արժե միշտ տարանջատել ժողովուրդը և պետությունը՝ իշխանություններից։ Քանի որ ժողովուրդը ճանաչում է Հայոց ցեղասպանությունը՝ ի տարբերություն կառավարության»,- ընդգծեց քաղաքագետը։

Նեթանյահուն օգոստոսի 26-ին առաջին անգամ հայտարարել էր, որ ճանաչում է 20-րդ դարի սկզբին Օսմանյան կայսրության կողմից հայերի, ասորիների և հույների դեմ իրականացված ցեղասպանությունը։ Նա այդ հայտարարությունն արել էր՝ պատասխանելով լրագրողի հարցին, թե ինչո՞ւ Իսրայելի ոչ մի վարչապետ չի ճանաչել Հայոց ցեղասպանությունը։ «Ես հենց նոր դա արեցի: Ես դա արել եմ»,- նշել էր Նեթանյահուն։

Արաքսյա Սնխչյան

Կարդացեք նաև՝