Մի քանի մեքենա անցել է, բայց խնդիրը լուծված չէ․ նախարարը՝ կոնյակ արտահանողների մասին

Հայաստանից ՌԴ կոնյակ արտահանող մի քանի մեքենա, որոնք արգելափակված էին Վրաստանի մաքսային տարածքում, անցել են անցակետը, բայց խնդիրն, ընդհանուր առմամբ, լուծված չէ, կառավարության նիստից հետո լրագրողներին հայտնել է ՀՀ էկոնոմիկայի նախարար Գևորգ Պապոյանը՝ մեկնաբանելով հայ-վրացական սահմանին ստուգումների պատճառով կուտակված հայկական բեռների խնդիրը։

Նախարարը տեղեկացրել է, որ գերատեսչությունը փորձում է լուծում գտնել բոլոր մակարդակներում։

«Միայն որոշ մեքենաներ են անցել, բայց խնդիրն ամբողջապես չի լուծվել։ Այս պահին դեռ պետք է հասկանանք՝ ի՞նչն է պատճառը։ Անկեղծ ասած՝ պատճառները մեզ համար անհասկանալի են»,- ասել է Պապոյանը։

Նա հավելել է, որ նախնական պայմանավորվածությամբ՝ առաջիկա շաբաթվա ընթացքում պատրաստվում է այցելել Վրաստան՝ խնդրին տեղում ծանոթանալու և լուծումներ գտնելու համար։

Պապոյանը հերքել է տեղեկությունը, թե կառավարության ուղղորդմամբ են կոնյակ արտադրողները մայիսի 13-ին ակցիա իրականացրել, քանի որ, ըստ լուրերի, կառավարությունը հարցին լուծում չի կարողացել տալ։

Մայիսի 13-ին ՀՀ-ում Վրաստանի դեսպանատան շենքի առջև ակցիայի ժամանակ արտահանողները հայտնել էին, որ ՌԴ մեկնող բեռնատարներն արգելափակված են Վրաստանի մաքսային տարածքում։ Ակցիայի մասնակիցները պահանջել էին լուծումներ տալ խնդրին՝ տեղեկացնելով, որ իրենց մեքենաներից հանվել են մաքսային կնիքներն ու անհասկանալի պատճառներով նմուշառումներ են իրականացվել փորձաքննության համար։