«Մեր ձևով» ժողովրդական շարժման համակարգող Նարեկ Կարապետյանը մեկնաբանել է վարչապետ Նիկոլ Փաշինյանի հայտարարությունը, ըստ որի՝ «Հայաստանում չկա ընտանիք, որից «Հայաստանի էլեկտրական ցանցեր» ընկերությունը չի գողացել»։
Կարապետյանի խոսքով՝ Փաշինյանն այդ հայտարարությունն արել է մտածված, որ դատական հայցի դեպքում կարողանան խուսափել հնարավոր իրավական հետևանքներից։
«Նա այդ հայտարարությունն արել է այդպիսի տերմինով, որ եթե մենք ՀԷՑ-ի անունից դատարան դիմենք՝ պահանջելով ապացուցել կամ ներողություն խնդրել, իր կողմից նշանակված կառավարիչը (Ռոմանոս Պետրոսյան-խմբ․) կարողանա հայցը հետ վերցնել՝ թույլ չտալով իր խոսքերի համար պատասխան տալ»,- ընդգծել է նա։
Կարապետյանն այդ համատեքստում շեշտել է, որ վերջին 10 տարում փոխվել է 800 հազար հաշվիչ, կորուստները 15-ից իջել են 6%-ի, տարեկան սակագնի 35-40 մլն դոլար է տնտեսվել, ինչի մասին տեղյակ է նաև Փաշինյանը։
«Երկրի վարչապետին այդ մասին 7 անգամ հաշվետվություն են ներկայացրել, բայց, կարծես, չհիշելու է տալիս, իսկ մեր երկրում գողություն անողներն ու թալանողներն իրենք են։ Հենց իրենք են թալանում երկիրը՝ անտրամաբանական տուգանքներով։ Որ գյուղ մտնում եմ, մարդիկ վարորդական իրավունքից զրկված են ինչ-որ անիմաստ խախտման պատճառով, ինչի հետևանքով չեն կարողանում պահել իրենց ընտանիքը»,- ասել է շարժման համակարգողը։
Կարապետյանը տեղեկացրել է, որ այդ ընտանիքներին վարորդական իրավունքը հետ ստանալու շանս տալն իրենց առաջին քայլերից է լինելու։
«Մեքենայով ընտանիք պահողներին երկրորդ շանս տալը մեր քայլերից է լինելու, որ իրենք ինչ-որ փորձաշրջան անցնելուց հետո կարողանան հետ ստանալ վարորդական իրավունքն ու կարողանան պահել իրենց ընտանիքը»,- նշել է Կարապետյանը։
Նա նաև ընդգծել է, որ տույժերը պետք է ոչ թե բարձր, այլ տրամաբանական դառնան, համապատասխանեն Հայաստանում մարդկանց միջին աշխատավարձերին։
Ընդգծելով, որ տույժերն ու տագանքները գնում են պետական բյուջե, Կարապետյանը մատնանշել է վարչապետի աշխատակազմի ավելացած ծախսերը։
«Այդ մարդը (Փաշինյան-խմբ․), որը մարդկանց մեղադրում է թալանի մեջ ու մոռանում է, թե ինքն ինչ է թալանել, թող հիշի, որ իր կառավարման ընթացքում վարչապետի աշխատակազմի ծախսերն ավելացրել է 4 անգամ՝ դարձնելով 65 մլն դոլար։ Արդյոք ՀՀ քաղաքացին 4 անգամ լա՞վ է ապրում, որ վարչապետի աշխատակազմը 4 անգամ ավելի շատ է ստանում։ Վարչապետի աշխատակազմն ավելի շատ է ստանում, քան Իսպանիայի, Շվեդիայի, Բելգիայի ու Դանիայի թագավորական ընտանիքները միասին»,- հավելել է Կարապետյանը։
Իշխանությունները ՀԷՑ-ը վերահսկողության տակ վերցնելու գործընթաց էին նախաձեռնել, երբ ընկերության սեփականատեր Սամվել Կարապետյանը եկեղեցուն աջակցելուց հետո կալանավորվել էր։ Ստոկհոլմի առևտրային պալատի արբիտրաժային ինստիտուտը հուլիսի 22-ին որոշում էր ընդունել, որը ՀՀ կառավարությանը պարտավորեցնում է ձեռնպահ մնալ ՀԷՑ-ի բռնագրավմանն ուղղված հետագա այլ քայլերից։ 2025 թվականի օգոստոսի 4-ին արբիտրաժը հաստատել էր ընկերության բռնագրավումն արգելող որոշման պարտադիր լինելը։ ՀԾԿՀ-ն նոյեմբերի 17-ին որոշում էր կայացրել դադարեցնել «Տաշիր կապիտալին» պատկանող ՀԷՑ-ի լիցենզիան։
