Երուսաղեմի քաղաքապետարանը Հայոց ցեղասպանությունը վերապրած հայտնի լուսանկարիչ Էլիա Քահվեջյանի անունով հրապարակ է անվանակոչել, հայտնում է հայ համայնքի ներկայացուցիչ Գեղամ Բալյանը։
Ցուցանակի վրա արված եբրայերեն գրության մեջ ասվում է․ «Էլիա Քահվեջյանի հրապարակ, Հայոց ցեղասպանությունը վերապրած, լուսանկարիչ, Երուսաղեմի սիրահար»։
Էլիան ծնվել է ժամանակակից Թուրքիայի Ուրֆա քաղաքում՝ հայկական ընտանիքում։ 1915 թվականին հինգ տարեկան էր, երբ ականատես էր դարձել Ուրֆայի հայ բնակիչների ապստամբությանը թուրքական բանակի դեմ: Ապստամբության ճնշումից հետո նրա հայրը և եղբայրներից մեկը սպանվել էին, իսկ մնացած հայ բնակչությունը՝ այդ թվում կանայք, երեխաներ և տարեցներ, ուղարկվել էին սիրիական Դեր Զորի անապատ։
Մահից առաջ մայրը նրան փրկել էր՝ վստահելով անծանոթ քուրդի, որն, ի վերջո, նրան երկու ոսկեդրամով վաճառել էր դարբինի։ Ավելի ուշ Էլիան փողոցում ողորմություն է հավաքել, հետո մանկատուն ընկել: Նրան ուղարկել էին Հալեպի, Նազարեթի և, ի վերջո, Երուսաղեմի որբանոցներ, որտեղ նա սկսել էր նոր կյանք, և լուսանկարչության մեջ նրա կյանքի ուղին պսակվել էր հաջողությամբ և համաշխարհային ճանաչմամբ:
Էլիայի ընտանիքի ավելի քան 100 անդամ՝ եղբայրներ և քույրեր, մորաքույրներ, հորեղբայրներ, զարմիկներ և քույրեր, ինչպես նաև ծնողներն սպանվել էին 1915 թվականին՝ Հայոց ցեղասպանության ժամանակ:
Այսօր նրա ժառանգությունը պահվում է նրա թոռան՝ էլի Քահվեջյանի կողմից Երուսաղեմի Հին քաղաքում գտնվող Elia Photo Service լուսանկարչական պատկերասրահում:
