«Հայաստանի էլեկտրական ցանցեր» ընկերության սեփականատեր, գործարար Սամվել Կարապետյանին պատկանող «Տաշիր կապիտալը» ՀԷՑ-ում պատմաբանին ընթացակարգի խախտումներով բարձր պաշտոնի նշանակելու հարցով հանցագործության մասին հաղորդում է ներկայացրել Հակակոռուպցիոն կոմիտե, Armenia Today-ին հայտնել է փաստաբան Տիգրան Հայրապետյանը։
Փաստաբանը տեղեկացրել է, որ հաղորդումը ներկայացրել են նոյեմբերի 12-ին՝ պահանջելով քրեական վարույթ նախաձեռնել և ուսումնասիրել ՀԷՑ ժամանակավոր կառավարիչ Ռոմանոս Պետրոսյանի, Հանրային ծառայությունները կարգավորող հանձնաժողովի նախագահ Մեսրոպ Մեսրոպյանի և ՀԾԿՀ անդամների գործողությունները` կապված ՀԷՑ-ի ֆինանսների գծով տնօրենի պաշտոնում Արմեն Շահնազարյանին նշանակելու հետ։
Հայրապետյանի խոսքով՝ Շահնազարյանն այդ պաշտոնին է նշանակվել խախտումներով։
«ՀԾԿՀ-ն սահմանադրական մարմին է, և առանց հանձնաժողովի չի կարելի էներգետիկայի ոլորտում ղեկավար պաշտոններում նշանակումներ անել։ Ըստ ընթացակարգի՝ պետք է դիմում ներկայացվի ՀԾԿՀ, և հանձնաժողովը 15 օրվա ընթացքում պետք է ասի՝ անձը համապատասխանո՞ւմ է այդ պաշտոնին, թե՞ ոչ։ Բացի այդ, ՀԷՑ-ի ֆինանսների գծով տնօրենը պետք է բարձրագույն կրթություն ունենա ֆինանսական կամ տնտեսական ուղղությամբ, ինչպես նաև 5 տարվա աշխատանքային փորձ»,- բացատրել է փաստաբանը։
Նրա դիտարկմամբ՝ Շահնազարյանի նշանակման դեպքում չի կատարվել օրենսդրական ու նորմատիվ ենթաօրենսդրական իրավական ակտի 2 պահանջ։
«Առաջինը՝ խախտվել է ընթացակարգը՝ դիմում չի ներկայացվել ՀԾԿՀ, երկրորդ՝ անձը, որին Պետրոսյանը նշանակել է, չունի տնտեսական կամ ֆինանսական գծով բարձրագույն կրթություն, միջազգայնագետ-պատմաբան է։ Այս պահանջները չեն կատարվել․ կա՛մ չեն դիմել հանձնաժողովին, կա՛մ Պետրոսյանը և Մեսրոպյանը նախապես համաձայնության են եկել, որ այդ պահանջները շրջանցեն ու իրենց ցանկացած մարդուն նշանակեն»,- նշել է Հայրապետյանը։
Փաստաբանի խոսքով՝ այսպիսով խախտում են թույլ տվել թե՛ ՀԷՑ ժամանակավոր կառավարիչը, թե՛ Մեսրոպյանը, թե՛ հանձնաժողովի անդամները, որոնք պարտավոր էին իմանալ տնօրենի նշանակման մասին ու հետևել, որ յուրաքանչյուր նշանակում համապատասխանի պաշտոնին։
«ՀԾԿՀ անդամները, սակայն, չեն հետևել, թեպետ չեն կարող դա որպես պատճառաբանություն բերել, քանի որ մամուլում այդ նշանակման վերաբերյալ հրապարակում կար։ Իրենք չեն կարող ասել՝ չենք իմացել, կան մեխանիզմներ, որ հետևեն՝ ով է նշանակվել։ Իսկ եթե չեն իմացել, ապա սա հանցավոր անփութություն է կամ պաշտոնեական լիազորությունները չկատարելու հետևանք»,- ընդգծել փաստաբանը։
Հայրապետյանը հավելել է, որ եթե Հակակոռուպցիոն կոմիտեն քրեական վարույթ նախաձեռնի, Պետրոսյանի պաշտոնավարումը պետք է կասեցվի։
«Բացի այդ, ՀԾԿՀ նախագահի ու մյուս անդամների վերաբերյալ պետք է նախաքննություն կատարվի՝ պարզելու, թե ինչպե՞ս է ստացվել, որ 15 օրյա ժամկետում ստուգում չի իրականացվել և եզրակացություն չի ներկայացվել, իսկ եթե ներկայացվել է, ապա ինչպե՞ս է այդ պաշտոնին նշանակվել պահանջներին չհամապատասխանող անձը»,- նշել է Հայրապետյանը։
Փաստաբանը շեշտել է, որ ՀԷՑ կառավարիչն իր ցանկությամբ իր ծանոթներին աշխատանքի տեղավորելու իրավունք ու լիազորություն չունի։
«Նա նշանակում է արել մի կազմակերպությունում, որի սեփականտերը չէ։ Պետրոսյանը նախկին տնօրենին աշխատանքից ազատելու ու իր ծանոթին, այն էլ՝ առանց համապատասխան որակավորման բարձր՝ 6500 դոլար աշխատավարձով պաշտոնի նշանակելու գործառույթ չունի»,- եզրափակել է փաստաբանը՝ հավելելով, որ կոմիտեից դեռ արձագանք չունեն։
Իշխանությունները ՀԷՑ-ը վերահսկողության տակ վերցնելու գործընթաց էին նախաձեռնել, երբ Կարապետյանը հունիսին եկեղեցուն աջակցելուց հետո կալանավորվել էր։ Պետրոսյանը ՀԷՑ ժամանակավոր կառավարչի պաշտոնին էր նշանակվել հուլիսին, երբ ՀԾԿՀ նախագահը ընկերությունում քննչական գործողություններից հետո ՀԷՑ-ի նկատմամբ վարչական վարույթ էր նախաձեռնել։
ՀԷՑ-ի գլխավոր տնօրենի նախկին պաշտոնակատար Դավիթ Ղազինյանը հայտնել էր ՀԷՑ-ի ղեկավար կազմի մի շարք աշխատակիցների հեռացման մասին։ Նա նշել էր, որ աշխատակիցներին նաև ճնշումների միջոցով են հեռացնում։
Նոյեմբերի 13-ին ՀԾԿՀ-ն քննարկելու է ՀԷՑ-ին լիցենզիայից զրկելու նախագիծը, ինչը ՀԷՑ վերահսկողական կոմիտեն սեփականության իրավունքի դեմ բացահայտ ոտնձգություն էր անվանել։
Աննա Բադալյան
Կարդացեք նաև՝
Ստեր են հրապարակում․ Ղազինյանը՝ ՀԾԿՀ-ի կողմից հոսանքի սակագինը նվազեցնելու առաջարկը մերժելու մասին
«Տաշիր Կապիտալ»-ն էլեկտրաէներգիայի սակագների իջեցման առաջարկ է ներկայացրել ՀԾԿՀ
Հավանական եմ համարում, որ ՀԷՑ-ը կզրկվի լիցենզիայից․ Ռոմանոս Պետրոսյան
