Արցախից բռնի տեղահանվածներից 1044 ընտանիք բնակարանային ապահովման պետական աջակցության ծրագրի շրջանակում հավաստագիր է ստացել: Նրանցից 969-ը ձեռք է բերել անշարժ գույք, Armenia Today-ին հայտնել են ՀՀ աշխատանքի և սոցիալական հարցերի նախարարությունից:
Նշենք, որ հավաստագիրը համարվում է իրացված, երբ ծրագրի շահառուն բանկի հետ կնքում է համապատասխան գործարք՝ բնակարան գնելու կամ կառուցելու համար վարկ տրամադրելու մասին։
Գերատեսչությունից մանրամասնել են, թե որ մարզերում են հավաստագրերն իրացրել բռնի տեղահանված ընտանիքները:
Դրանք են
• Արագածոտն – 27,
• Արարատ – 110,
• Արմավիր – 177,
• Գեղարքունիք – 43,
• Երևան – 163,
• Լոռի – 124,
• Կոտայք – 243,
• Շիրակ – 50,
• Սյունիք – 61,
• Վայոց ձոր – 18,
• Տավուշ – 28։
Նախարարությունից հավելել են, որ հավաստագրի շրջանակում անհատական բնակելի տուն է կառուցում 10 ընտանիք։
Ըստ Աշխատանքի և սոցիալական հարցերի նախարարության՝ ծրագրի շրջանակում հավաստագրի համար դիմած ընտանիքներին հավաստագիրը տրամադրվում է «հաշված րոպեների ընթացքում, ուստի դիմած և հավաստագրի հաստատմանն սպասող անձինք առկա չեն»։
2023 թվականի սեպտեմբերի 19-ին Ադրբեջանը հարձակվել էր Արցախի վրա։ Ռազմական գործողությունների ավարտից հետո Արցախի ամբողջ բնակչությունը բռնի տեղահանվել էր։ Արցախից բռնի տեղահանված 100 632 քաղաքացի էր հասել ՀՀ։
Կարդացեք նաև՝
«Երկու տարի առանց Արցախի». սեպտեմբերի 19-ը հայտարարվել է Բռնի տեղահանության և պահանջատիրության օր
«Մեկ տարի առանց Արցախի». 2023թ․ ադրբեջանական հարձակման և բնիկ հայերի տեղահանության ժամանակագրություն
Բարձր հարկեր և աջակցության բացակայություն. ի՞նչ դժվարություններ ունի արցախյան բիզնեսը
Արցախցիների համար պետական ծրագրերը նվազում են, Սամվել Կարապետյանինը՝ շարունակվում․ «Մեր ձևով» շարժման անդամ
