Հայոց ցեղասպանության հուշահամալիրի հիմնանորոգման շուրջ հնչած որակումների առնչությամբ իրավական գործընթաց ենք սկսելու, ԱԺ-Կառավարություն հարցուպատասխանի ժամանակ հայտարարել է ԿԳՄՍ նախարար Ժաննա Անդրեասյանը։
Նրա խոսքով՝ մարդիկ պետք է պատասխան տան «այն բոլոր անհեթեթ, իրականությանը չհամապատասխանող, մարդու արժանապատվությունն ու պատիվը ոտնահարող, թիրախավորող» խոսքերի համար, որ հնչեցնում են։
«Առաջիկայում կլինեն համապատասխան հայցեր, և դրա արդյունքում կտեսնենք, թե այդ որակումներից ո՞րն ու ինչքանո՞վ տեղ ունեն»,- նշել է Անդրեասյանը։
Նախարարի խոսքով՝ հուշահամալիրը 60 տարիների ընթացքում չի վերանորոգվել, ունեցել է ջրահեռացման հետ կապված լրջագույն խնդիրներ, որոնք եթե ժամանակին լուծված լինեին, այսօր չէին լինի, իսկ 2015-ին այնտեղ իրականացվել են հապճեպ, հապշտապ աշխատանքներ, շեշտել է նա։
«Այսօր ունենք խնդիր, երբ թանգարանի 10 տարեկան շենքում հարցեր կան, երբ պետք է դրանք ուղղակի չլինեին, որովհետև 10 տարին շենքի համար այն ժամանակը չէ, որ այդ հարցերն առաջանային, ու սա նշանակում է, որ լրջագույն խնդիրներ կան, որոնք տարիներով կուտակվել են։ Եվ այսօր փորձում ենք մեր կարևորագույն հուշարձանը բերել պատշաճ տեսքի, որովհետև ամեն ապրիլի 24-ին բազմահազար մարդիկ են այցելում։ Եվ ո՞վ էր պատասխան տալու, եթե այդ մույթերից որևէ սալ պոկվեր, ո՞վ էր պատասխան տալու, և արդյոք չպիտի՞ պետությունը ժամանակին ու պատշաճ արձագանքեր դրան»,- պարզաբանել է նախարարը։
Անդրեասյանի խոսքով՝ աշխատանքներն ընթանում են օրենսդրությամբ նախատեսված բոլոր ընթացակարգերով, իսկ հուշարձանն, առհասարակ, նման դեպքերում անցնում է գիտամեթոդական խորհրդի քննարկումներ, մասնագիտական հանձնաժողովի եզրակացություններ, որոնք պատշաճ տեղի են ունեցել։
Նա նշել է, որ ամբողջ աղմուկի շրջանում Ճարտարապետների միությունից ստացել են առանձին գրություններ և մեկ անգամ ևս հրավիրել բոլոր մասնագետներին ու կազմակերպել լրացուցիչ քննարկում, որտեղ վերահաստատվել են բոլոր մասնագիտական լուծումների մոտեցումները։
«Այո՛, սա իմ անձնական հսկողության տակ է, ես ամեն շաբաթ եմ այցելում, որպեսզի նաև տեսնեմ ինչպես են աշխատանքներն ընթանում, և վստահեցնում եմ, հուշահամալիրը բաց է, թանգարանը բաց է, մեր յուրաքանչյուր քաղաքացի ցանկացած պահի կարող է այցելել, դրանք երբեք չեն փակվելու»,- հավաստիացրել է նա։
Անդրեասյանը հավելել է, որ մույթերի վերականգնման տեխնոլոգիական լուծումները գտնված են, և առաջիկա օրերին դրանց աշխատանքները կմեկնարկեն, իսկ այս պահին կանաչապատման գործընթաց է, հուշապատին հարակից տարածքն է վերանորոգվում, թանգարանի տարիքի ջրահեռացման աշխատանքներն են արվում, մինչև ամսվա վերջ դրանք բոլորը կավարտվեն, այնուհետև կանցնեն մյուս փուլի աշխատանքներին։
Հայոց ցեղասպանության թանգարան-ինստիտուտից օգոստոսի 26-ին հայտնել էին, որ մեկնարկել է թանգարան-ինստիտուտի հիմնանորոգման աշխատանքների երկրորդ փուլը։ Սեպտեմբերի 1-ին հուշահամալիրում շինաշխատանքները դադարեցնելու պահանջով բողոքի ակցիա էր տեղի ունեցել։ Պետական կառույցներից քաղաքացիներին խոստացել էին մինչև սեպտեմբերի 8-ը պատասխանել իրենց հետաքրքրող 15 կետից բաղկացած հարցադրումներին, և ժամանակավորապես դադարեցրել էին շինաշխատանքները։ ՀՀ կրթության, գիտության, մշակույթ, սպորտի նախարարությանը կից գիտամեթոդական խորհուրդը սեպտեմբերի 5-ին վերահաստատել էր Հայոց ցեղասպանության հուշահամալիրի վերանորոգման նախագիծը՝ չնայած հանրային դժգոհությանը։
Հայոց ցեղասպանության թանգարան-ինստիտուտի նախկին տնօրեն, պատմական գիտությունների դոկտոր Հայկ Դեմոյանն Armenia Today-ին հայտնել էր, որ Ծիծեռնակաբերդում՝ Հայոց ցեղասպանության զոհերի հուշահամալիրում իրականացվող հիմնանորոգման աշխատանքներն անդառնալի վնաս են հասցրել հուշարձանին։
Կարդացեք նաև՝
«Վանդալիզմ է»․ քաղաքացիները պահանջում են դադարեցնել Ծիծեռնակաբերդի շինարարությունը
