Իրանը կխոչընդոտի Հարավային Կովկասում ամերիկյան միջանցքի ստեղծմանը, Tasnim-ին ասել է Իրանի գերագույն առաջնորդ այաթոլլա Խամենեիի ավագ խորհրդական Ալի Աքբար Վելայաթին։ Նրա խոսքով՝ «Զանգեզուրի միջանցքի» ստեղծումը կհանգեցնի Հայաստանի «քայքայմանը»։
Վելայաթիի խոսքով՝ երեկ ստորագրված հռչակագրի շրջանակներում նախատեսված միջանցքը «կվերածվի Դոնալդ Թրամփի վարձկանների գերեզմանոցի, այլ ոչ թե ԱՄՆ նախագահին պատկանող երթուղու»։
Նա նշել է, որ Իրանը միշտ դեմ է եղել «Զանգեզուրի միջանցքի» ստեղծմանը, քանի որ, ըստ Վելայաթիի, դա կփոխի տարածաշրջանի աշխարհաքաղաքականությունը, կվերաձևավորի սահմանները և «կհանգեցնի Հայաստանի քայքայմանը»։ Խորհրդականի խոսքով՝ միջանցքի ստեղծման ծրագրին «դեմ է նաև հայ ժողովուրդը, քանի որ դա կհանգեցնի նրանց երկրի քայքայմանը»։
Վելայաթին նաև հայտնել է, որ Հայաստանի վարչապետ Նիկոլ Փաշինյանը Իրան կատարած նախորդ այցելությունների ժամանակ հայտարարել էր, որ միջանցքի նախագիծը վնասակար է և «համաձայն Իրանի դիրքորոշման՝ արտահայտել է իր անհամաձայնությունը միջանցքի ստեղծման հետ»։
Գերագույն առաջնորդի խորհրդականը զգուշացրել է, որ միջանցքի ծրագրի իրականացումը կվտանգի Հարավային Կովկասի անվտանգությունը:
«Արդյունքում, Իրանը պնդում է, որ կգործի Հարավային Կովկասի անվտանգության շահերին համապատասխան՝ Ռուսաստանի հետ կամ առանց: Մենք կարծում ենք, որ Ռուսաստանը նույնպես ռազմավարական առումով դեմ է այս միջանցքին», - ասել է Վելայաթին:
Օգոստոսի 8-ին Հայաստանի և Ադրբեջանի առաջնորդները, Միացյալ Նահանգների միջնորդությամբ, ստորագրել են խաղաղության ցանկության մասին հռչակագիր, ինչպես նաև TRIPP (Trump Route for International Peace and Prosperity) տարանցիկ միջանցքի ստեղծման մասին համաձայնագիր, որի զարգացումը կապահովվի ամերիկյան կոնսորցիումի վերահսկողության ներքո: Հայտարարվել է նաև ԵԱՀԿ Մինսկի խմբի լուծարման և ԱՄՆ-ի և Ադրբեջանի միջև ռազմական համագործակցության սահմանափակումների վերացման մասին:
