«Տաշիր» հիմնադրամը դատի է տվել Երևանի քաղաքապետարանին, տեղեկանում ենք DataLex-ից:
Հիմնադրամը պահանջել է ոչ իրավաչափ ճանաչել 01.07.2025թ. Ծիծեռնակաբերդի խճուղի 3 հասցեում տեղակայված և սեփականության իրավունքով «Դալմա Ինվեստ» ՍՊ ընկերությանը պատկանող «Դալմա Գարդեն Մոլ» զվարճանքի առևտրային համալիրի արտաքին պատին տեղադրված թվով 6 պաստառների ապամոնտաժման, մասնավորապես՝ պաստառները տեղադրման վայրից հանելու (պոկելու), պատասխանողի տիրապետման տակ գտնվող տրանսպորտային միջոցում տեղադրելու և հեռացնելու գործողությունները և վերացնել հետևանքները:
Դատարանը գործը ստացել է երեկ՝ հուլիսի 17-ին և մակագրել է դատավոր Ռուզաննա Ազրոյանին։
Երևանի քաղաքապետարանը հուլիսի 1-ին «Դալմա Գարդեն Մոլի» շենքից հեռացրել էր Կարապետյանին ազատ արձակելու կոչով պաստառները։
Հունիսի 25-ին Հյուսիսային պողոտայում քաղաքապետարանի աշխատակիցներն ապամոնտաժել էին Կարապետյանին ազատ արձակելու կոչով էկրանները։ Ապամոնտաժումը տեղի էր ունեցել սեփականատիրոջ տարածքում, որտեղ էկրանները տեղադրվել էին օրինական հիմունքներով, Armenia Today-ին հայտնել էր «Դալմա Գարդեն Մոլի» ներկայացուցիչ Վարդան Ալոյանը։ Երևանի քաղաքապետարանից ապամոնտաժումը բացատրել էին 2024-ի հունվարին ուժի մեջ մտած նոր կարգավորումներով։
Հունիսի 19-ին դատարանը երկու ամսով կալանավորել էր Կարապետյանին իշխանությունը զավթելու կոչեր անելու մեղադրանքով, երբ նա քննադատել էր Ամենայն Հայոց կաթողիկոսի և հոգևորականների դեմ Հայաստանի իշխանությունների արշավը: Գործարարը չի ընդունում մեղադրանքը և մտադիր է բողոքարկել այն եվրոպական դատարանում: Ավելի ուշ Կարապետյանը հայտարարել էր նոր քաղաքական ուժ ձևավորելու մասին։
Կարդացեք նաև՝
«Պայքար՝ մեր ձևով». Երևանում հավաք ու երթ է անցկացվել՝ ի աջակցություն Սամվել Կարապետյանի
Ինչո՞ւ են Սամվել Կարապետյանին կալանավորել. եկեղեցի, քաղաքականություն, ներդրումային ռիսկեր
«Չուլանացված» եկեղեցիներից մինչև կաթողիկոսի փոփոխության կոչ․ ի՞նչ օրակարգ է փորձում պարտադրել Փաշինյանը
