Բագրատ արքեպիսկոպոս Գալստանյանի փաստաբան Հովհաննես Խուդոյանը հայտարարել է, որ իր պաշտպանյալի հետ որոշել են վիրավորանքների ու զրպարտությունների համար հայցեր ներկայացնել դատարան։
«Մոտ օրերին դատարան կներկայացվի հայցերի առաջին տասնյակը՝ բոլոր օղակների զազրախոսների դեմ»,- գրել է փաստաբանը։
Նա այդ համատեքստում անդրադարձել է Քննչական կոմիտեի՝ ավելի վաղ հրապարած ձայնագրությանն՝ ընդգծելով, որ այն «կեղծ է»։
«Արդեն ապացուցված է, որ ՔԿ-ն կեղծել է ձայնագրությունները, կոնտեքստից կտրված է հանցագործներին մահապատժի ենթարկելու (գյուլլելու) միտքը։ Առկա են նաև բազմաթիվ չհրապարակված նյութեր, որոնք հակադրվում են մոնտաժված ձայնագրություններին։ Իրավապահների կեղծիքները հեշտացնելու նպատակով մեղադրանքներն ուռճացվում են տարբեր օղակների քարոզիչների կողմից։ Օրինակ՝ Ազգային ժողովում կամ եթերներում հայտարարում են ավտոբուսներ հրկիզելու կամ մարդկանց սպանելու մասին, սակայն այդպիսի տվյալ չկա ո՛չ կեղծ մեղադրանքում, ո՛չ էլ ասվել է որևէ իրավապահի կողմից»,- նշել է Խուդոյանը։
Անդրադառնալով Փաշինյանի հուլիսի 7-ի գրառմանը, որտեղ նա հայտարարել էր, թե «Վաղարշապատի որևէ տարածք չի կարող իրավապահների գործունեության համար փակ լինել», Խուդոյանը հավելել է, որ «նրա առաջին թիրախը եկեղեցին է»։
«Իրավապահներին հորդորում եմ չփորձել պաշտպանվել այս կեղծիքներով, դրանք չափազանց ակնհայտ են: Վեհարանը գրոհած յուրաքանչյուրիդ դեմքը ֆիքսվելու է և տրվի հանրությանը»,- ընդգծել է նա։
Հունիսի 25-ին ԱԱԾ-ն խուզարկություններ էր իրականացրել «Սրբազան պայքար» շարժման աջակիցների բնակարաններում իշխանության զավթման փորձի շուրջ քրեական գործի շրջանակում։ Այն հարուցվել էր Civic.am կայքի հրապարակած փաստաթղթի հիման վրա, որն ըստ կայքի՝ «Հեղաշրջման պլան» էր։ Քննչական կոմիտեն հայտնել էր գործողությունների մասին։
Իրավապահներն, ընդհանուր առմամբ, 17 անձի նկատմամբ կալանքի միջնորդություն էին ներկայացրել դատարան։ Նրանցից 15-ի նկատմամբ դատարանը կիրառել էր կալանք՝ երկու ամիս ժամկետով։
Կարդացեք նաև՝
Գալստանյանը ՔԿՀ-ից հերքել է իր կողմից ՔԿ ձայնագրության իսկությունը հաստատելու մասին տեղեկությունը
