Վաղարշապատի համայանքապետի ընտրությունները կկայանան նոյեմբերի 16-ին, կառավարության հունիսի 20-ի նիստում հայտարարել է Տարածքային կառավարման և ենթակառուցվածքների նախարար Դավիթ Խուդաթյանը։
Նիստում կառավարությունը հաստատել է նախագիծ, որով Վաղարշապատ և Խոյ համայնքները կմիավորվեն։ Վերջիններիս կազմում, ընդհանուր առմամբ, 19 բնակավայր կա։
«Այսպիսով՝ առաջարկվող ծրագրում ներգրավված է լինելու թվով 2 համայնք, 19 բնակավայր, որոնց միավորման արդյունքում ձևավորվելու է մեկ համայնք։ Նախագծի նպատակն է Վաղարշապատ համայնքում նշանակել համայնքի ավագանու ընտրություն»,- ասված է նախագծում։
Նախարարությունում կարծում են, որ համայնքների միավորման արդյունքում հնարավոր կլինի ռեսուրսները կենտրոնացնել, ավելի լայնածավալ ծրագրեր իրականացնել, ինչպես նաև ընդլայնել ներդրումների ներգրավման հնարավորությունները, օպտիմալացնել կառավարման ծախսերը։
ՀՀ տարածքային կառավարման և ենթակառուցվածքների նախարարության կողմից մշակվել է «Հայաստանի Հանրապետության վարչատարածքային բաժանման մասին» օրենքում փոփոխություն կատարելու մասին» ՀՀ օրենքի նախագիծը, որի համաձայն՝ նախատեսվում է ձևավորել Արմավիրի մարզի Վաղարշապատ համայնքային «նոր փունջ»:
Վաշարշապատի քաղաքապետ Դիանա Գասպարյանը մայիսի 15-ին հրաժարական էր տվել պաշտոնից։ Մայիսի 24-ին ԶԼՄ-ն հայտնել էր, որ իշխանությունները մտադիր են ևս մեկ անգամ խոշորացնել Վաղարշապատ համայնքը՝ միավորելով Խոյ համայնքի հետ և զոհված ազատամարտիկ Մեխակ Մեխակյանի որդուն՝ Արգիշտի Մեխակյանին, նշանակել Էջմիածնի քաղաքապետ։
Համայնքի ղեկավարի արտահերթ ընտրությունները նշանակվել էին հունիսի 12-ին, սակայն համայնքի ավագանու «Քաղաքացիական պայմանագիր» խմբակցությունը չէր ներկայացել նիստին և այն չէր կայացել։
