Քասախի բնակիչները հունիսի 16-ին փակել էին Երևան-Աշտարակ խճուղին՝ պահանջելով վերականգնել 59 համարի երթուղու աշխատանքը դեպի բնակավայր և պատշաճ տրանսպորտային ծառայություն ապահովել բնակիչների համար։
Ոստիկանության հետ բախումից հետո, ինչի հետևանքով քաղաքացիներ էին բերման ենթարկվել, ցուցարարները բացել էին ավտոճանապարհը։
59 համարի ավտոբուսը նոր որոշմամբ այլևս մուտք չի գործում Քասախ և չի սպասարկում բնակիչներին, քանի որ այն պատկանում է Երևան քաղաքին։ Փոխարենը՝ այսուհետ «Մուլտի տրանս» ընկերությունն է միայն տրանսպորտային ծառայություն մատուցում Քասախում, ինչից բնակիչները դժգոհ են։ Նրանք նշել են, որ ընկերությունը շուրջ 15 օր է, ինչ համայնքում ուղևորափոխադրում է կատարում, բայց դրանք իրականացնում է ուշացումներով, ինչի հետևանքով բնակիչների ու ընկերության վարորդների միջև բախումներ են տեղի ունենում։
«Մենք լսելի չենք դառնում, ուստի նման միջոցի ենք դիմել»,- հայտարարել են ճանապարհը փակած քասախցիները։
Ակցիայի մեկնարկից հետո ոստիկանների և քասախցիների միջև միջադեպ է տեղի ունեցել, երբ ակցիայի մասնակիցները հրաժարվել են բացել ճանապարհը, և ոստիկաններն սկսել են բերման ենթարկել քաղաքացիներին, իսկ նրանցից մեկը հարվածել է 24news-ի լրագրող Մերի Մանուկյանին։
Ավելի ուշ ՆԳՆ խոսնակ Նարեկ Սարգսյանն Armenia Today-ին հայտնել է, որ քասախցիների ակցիայից բերման է ենթարկվել 11 անձ, իսկ ոստիկանի կողմից լրագրողին հարվածելու դեպքի առնչությամբ անմիջապես ծառայողական քննություն է նշանակվել։ ՆԳՆ խոսնակն ավելի ուշ հայտնել է, որ ոստիկանության ծառայողի և լրագրողի միջև տեղի ունեցած միջադեպի մասնակից ոստիկանն ազատվել է ծառայությունից։
Նարեկ Սարգսյանը տեղեկացրել է, որ նրանց բերման են ենթարկել Վարչական իրավախախտման վերաբերյալ օրենսգրքի 182-րդ հոդվածով նախատեսված արարք կատարելու համար (ոստիկանության զորքերի զինծառայողի կամ ոստիկանության ծառայողի օրինական պահանջը չկատարելը, որը պատժվում է տուգանքով՝ սահմանված նվազագույն աշխատավարձի հիսնապատիկի չափով-խմբ․)։
ՄԻՊ գրասենյակից տեղեկացրել են, որ արագ արձագանքման խումբ է մեկնել է ոստիկանության բաժին՝ քաղաքացիներին բերման ենթարկելու դեպքերն ուսումնասիրելու, նրանց հետ առանձնազրույցներ իրականացնելու համար։ Մարդու իրավունքների պաշտպան Անահիտ Մանասյանը դատապարտել է լրագրողի մասնագիտական գործունեությանն առերևույթ խոչընդոտելու և բռնություն կիրառելու դեպքը։
«Լրագրողների համար պետք է երաշխավորված լինի մասնագիտական գործունեությունն իրականացնելու համար պատշաճ միջավայր: Պաշտպանը պահանջում է, որպեսզի իրավասու մարմինները պատշաճ քննություն իրականացնեն նշված դեպքով»,- ասված է ՄԻՊ հայտարարության մեջ։
Ապրիլի 5-ին և հունիսի 5-ին Պռոշյան և Քասախ համայնքների բնակիչները բողոքի ակցիա էին իրականացրել թիվ 25 և 59 երթուղին սպասարկող ավտոբուսների կրճատման և նոր՝ ավելի թանկ երթուղու դեմ։ Ի նշան բողոքի՝ նրանք ժամանակավորապես փակել էին Երևան-Աշտարակ մայրուղու հատվածը: Ապրիլի 9-ին պռոշյանցիներին ընդունել էին կառավարությունում և ժամանակավոր լուծում տվել իրենց հարցին։ Ապրիլի 10-ին Քասախի բնակիչները փակել էին Երևան-Աշտարակ ավտոճանապարհը՝ պահանջելով չեղարկել դեպի Երևան տրանսպորտի 59 ավտոբուսային երթուղիների կրճատման և տրանսպորտի վարձը բարձրացնելու որոշումները։
ՏԿԵ նախարարությունը համայնքներին առաջարկել էր 50 դրամով նվազեցնել ճանապարհածախսը՝ դարձնելով 200 դրամ Պռոշյանի և 150 դրամ՝ Քասախի համար։ Բացի այդ, նախարարությունն առաջարկել էր տրանսպորտին հասանելիություն՝ բնակավայրերին հարող միջպետական ճանապարհից, տրանսպորտային միջոցների թվաքանակի ավելացում, իսկ Երևանում՝ վերջնակետի փոփոխություն։
Թարմացվել է ժամը 12։32-ին։
Աննա Բադալյան
