Հունիսի 12-ին Ազգային շենքի մոտ տեղի ունեցած բախումները ցույց տվեցին, որ այս ռեժիմի օրոք նոր «Մարտի 1»-երը չեն բացառվում, Ազգային ժողովում հայտարարել է «Հայաստան» խմբակցության քարտուղար Արծվիկ Մինասյանը։
Նա հիշեցրել է բախումների հետևանքով վնասվածքներ ստացած քաղաքացիների և մի քանի ոստիկանի մասին։
«Ոչ լեգիտիմ իշխանությունների գործողությունների հետևանքով հարյուրավոր քաղաքացիներ ստացել են մարմնական վնասվածքներ։ Միևնույն ժամանակ երեկվա իրադարձությունները հաստատեցին, որ մենք շարունակում ենք գտնվել մի քաղաքական ռեժիմի կառավարման ներքո, որը ոչինչ չի խնայում։ Այն ոչ մի կարմիր գիծ չունի, պատրաստ է ամենաբիրտ մեթոդներով, ամենակոշտ, հանցավոր գործողություններով ոտնահարել ոչ միայն սահմանադրական կարգը, այլև ամեն ինչ զոհաբերել՝ բացի աթոռից»,- հայտարարել է ընդդիմադիր պատգամավորը։
Մինասյանը հայտարարել է, որ «իշխանությունը հատուկ էր մշակել ոստիկանական գործողությունները և նախապես վարկաբեկման արշավ էր սկսել «Տավուշը հանուն հայրենիքի» շարժման դեմ»։
«ԱԺ ամբիոնից Փաշինյանը ոգևորիչ խեսքեր էր հնչեցնում բռնություն կիրառած ոստիկանների նկատմամբ՝ տալով նաև պարգևատրման խոստումներ»,- հավելել է պատգամավորը։
Հունիսի 12-ին «Տավուշը հանուն հայրենիքի» շարժման առաջնորդ Բագրատ արքեպիսկոպոս Գալստանյանը քաղաքացիներին ԱԺ շենքի մոտ հրավիրել էր հավաքի՝ կառավարության և վարչապետ Նիկոլ Փաշինյանի հրաժարականի պահանջով։ Ազգային ժողովում զուգահեռ տեղի էր ունենում ԱԺ-Կառավարություն հարցուպատասխանը, որին մասնակցում էր Նիկոլ Փաշինյանը։ Հավաքի ընթացքում իրավիճակը լարվել էր և ոստիկանների ու ցուցարարների միջև բախումներ էին սկսվել։ Ոստիկանությունը հատուկ միջոցներ էր կիրառել, ինչի հետևանքով կան վիրավորներ։ Քննչական կոմիտեն բախումների առթիվ քրեական վարույթ էր նախաձեռնել։
Տավուշի սահմանամերձ գյուղերի բնակիչները բողոքի ակցիաներ էին սկսել ՀՀ ԱԳՆ-ի՝ ապրիլի 19-ին հայտարարությունից հետո, որով Հայաստանն ու Ադրբեջանը պայմանավորվել են սահմանազատման գործընթացն սկսել Տավուշից։ Բնակիչները հայտարարել էին, որ դեմ են Հայաստանի զիջումներին։ Մայիսի 4-ին «Տավուշը հանուն հայրենիքի» շարժումը երթ էր սկսել դեպի Երևան, ուր հասել էին մայիսի 9-ին և նույն օրն անցկացրել առաջին հանրահավաքը՝ հայտարարելով, որ պատրաստվում են ԱԺ-ում Փաշինյանի նկատմամբ անվստահության գործընթաց սկսել։ Երևանն ու Բաքուն մայիսի 15-ին ստորագրել էին Տավուշում սահմանի սահմանազատման արձանագրությունը։
Մայիսի 24-ին ՀՀ ԱԱԾ-ն հայտարարել էր, որ սահմանապահ զորքերը Տավուշում պաշտոնապես անցել են Ադրբեջանի հետ սահմանազատված սահմանի պահպանությանը, որը կիրականացվի Բերքաբեր բնակավայրի 1,9 կմ, Ոսկեպար և Բաղանիս բնակավայրերի 4,9 կմ հատվածներում։ Մայիսի 26-ին «Տավուշը հանուն հայրենիքի» շարժումը հանրահավաք էր իրականացրել, որի ընթացքում հայտարարել էին, որ վարչապետի իրենց թեկնածուն Բագրատ Սրբազանն է։ Շարժումը պահանջել էր վարչապետ Նիկոլ Փաշինյանի հրաժարականը՝ հայտարարելով մայիսի 27-ից անհնազանդության ակցիաներ սկսելու մասին։ Հունիսի 9-ին անցկացրած հանրահավաքից առաջ շարժման առաջնորդները հայտարարել էին, որ 4 օր մնալու են փողոցում և հասնելու են Փաշինյանի ու կառավարության հրաժարականին։ Հունիսի 10-ին ցուցարարները վրաններ էին տեղադրել Ազգային ժողովի դիմաց՝ փակելով Բաղրամյան պողոտան։
Մանրամասները՝ տեսանյութում։
