Փաստաբան Արամ Վարդևանյանը հայտնել է, որ «Տաշիր» ընկերությունների խմբի նախագահ Սամվել Կարապետյանի պաշտպանական կողմն ստացել է Վերաքննիչ դատարանի որոշումը՝ տնային կալանքի դեմ փաստաբանների ներկայացված բողոքի վերաբերյալ։
Իր տեսաուղերձում Վարդևանյանը ցուցադրել է դատարանի պատասխանը, որն իրենից ներկայացնում է 160 էջանոց փաստաթղթերի տպագիր փաթեթ։
Ըստ փաստաբանի՝ չնայած նախաքննության ավարտին և խափանման միջոցը վերացնելու բոլոր իրավական հիմքերին, դատարանը, փաստացի, խուսափել է հարցի վերջնական լուծումից՝ այն թողնելով առաջիկա դատական նիստին։
Ըստ Վարդևանյանի՝ դատարանը չի անդրադարձել նաև տեսաուղերձների սահմանափակման հարցին։ Նրա պնդմամբ՝ սա դասագրքային քաղաքական հետապնդման վկայություն է, քանի որ նախաքննության ավարտի պայմաններում առկա էին տնային կալանքը վերացնելու բոլոր իրավական հիմքերը, և իրավական բովանդակային հակափաստարկ գոյություն չունի:
«Մեր որոշ հիմնավորումների հետ համաձայնություն արձանագրվել է, սակայն տեղի ունեցողը որակում ենք որպես տասնամսյա քաղաքական հետապնդում։ Սա Եվրոպական կոնվենցիայի 5-րդ և 18-րդ հոդվածների ակնհայտ խախտում է և իրավունքի ժխտողականություն»,- պարզաբանել է փաստաբանը։
Նա շեշտել է, որ խափանման միջոցների պահպանումը պայմանավորված է քաղաքական դրդապատճառներով, մասնավորապես՝ «Ուժեղ Հայաստան» կուսակցության և Կարապետյանի վարկանիշի դինամիկ աճով։
«Սոցհարցումների տվյալներով՝ մեր վարկանիշի աճն ու գործող իշխանությունների վստահության անկումը հանգեցնում են նրան, որ այս սահմանափակումները պահպանվում են։ Սա Կարապետյանի հանդեպ անհասկանալի վախի դրսևորում է, քանի որ չկա որևէ ողջամիտ իրավական տրամաբանություն, որ նա պետք է գտնվի կալանքի տակ»,- պարզաբանել է Վարդևանյանը։
Փաստաբանը վստահություն է հայտնել, որ իրավունքի գերակայությունը կհաստատվի, և կոչ է արել ազատ արձակել բոլոր քաղբանտարկյալներին։
Կարապետյանին կալանավորել էին 2025-ի հունիսին՝ եկեղեցու դեմ արշավը քննադատելուց հետո։ Ավելի քան վեց ամիս անազատության մեջ անցկացնելուց հետո՝ դեկտեմբերի 30-ից, նրա նկատմամբ խափանման միջոց էր կիրառվել տնային կալանքը և գրավը։ Դատարանը մարտի 14-ին ևս մեկ ամսով երկարաձգել էր նրա տնային կալանքը:
Փետրվարի 11-ին Կարապետյանը միաձայն ընտրվել էր «Ուժեղ Հայաստան» կուսակցության նախագահ, ԱԺ ընտրություններում քաղաքական ուժի վարչապետի թեկնածուն է: «Ուժեղ Հայաստանն» առաջարկել էր 6 լուծում՝ ՀՀ անվտանգային համակարգն ամրապնդելու համար։
