Շիրակի թեմի բանտարկված առաջնորդ Միքայել արքեպիսկոպոս Աջապահյանին, նախնական տեղեկություններով, վաղը՝ դեկտեմբերի 16-ին, կտեղափոխեն հիվանդանոց, հայտնել է արքեպիսկոպոսի փաստաբան Երեմ Սարգսյանը։
Փաստաբանը, սակայն, տեղեկություններ չունի, թե հստակ երբ կվիրահատեն Աջապահյանին։
Վերաքննիչ դատարանն այսօր հետաձգել էր արքեպիսկոպոսի գործով դատական նիստը, ուր քննելու էին Աջապահյանի պատիժը 2 տարվա փոխարեն երկուսուկես տարի դարձնելու մեղադրող կողմի միջնորդությունը։ Փաստաբաններն առարկել էին դատական նիստ անցկացնել, քանի որ դահլիճը փոքր էր։
«Բացի նրանից, որ դահլիճը փոքր է, աշխատանքային իրավիճակն էլ բավականին խնդրահարույց է։ Ուզում եմ համակարգիչս հանել, բայց անհնար է փաստաթղթերի հետ նույն սեղանին համակարգչով աշխատել»,- նշել է Սարգսյանը։
Նշենք, որ Աջապահյանի բազմաթիվ աջակիցներ չէին կարողացել մուտք գործել դատական նիստերի դահլիճ։ Նրանք դահլիճից դուրս էին իրենց աջակցությունը հայտնել նրան։
Արքեպիսկոպոսի պատիժն ավելացնելու հարցով հաջորդ դատական նիստը տեղի կունենա հունվարի 13-ին՝ ժամը 15:00-ին։
Աջապահյանը հոկտեմբերի 3-ին դատապարտվել էր 2 տարվա ազատազրկման՝ «իշխանությունը զավթելու հրապարակային կոչերի» համար։ «Հայաստան» խմբակցության պատգամավոր Գառնիկ Դանիելյանը հայտարարել էր, որ Աջապահյանն անհապաղ վիրահատության կարիք ունի: Միքայել սրբազանը ցանկություն էր հայտնել իր միջոցների հաշվին վիրահատվել «Իզմիրլյան» բժշկական կենտրոնում, դեկտեմբերի 11-ին «Քրեակատարողական բժշկական կենտրոնն» առաջարկել էր կազմակերպել Աջապահյանին ցուցված վիրահատությունը։
