Երևանի ավագանին հունվարի 31-ի արտահերթ նիստում ընդունեց նախագիծը, որով փետրվարի 1-ից տրանսպորտի 1 ուղևորության համար քաղաքացիները կարող են 300-ի փոխարեն 150 դրամ վճարել։
Որոշումն ընդունվեց 33 կողմ, 0 դեմ և 0 ձեռնպահ ձայներով։ 150 դրամ սակագինը պահպանվելու է 2025 թվականի ընթացքում։
Երևանի փոխքաղաքապետ Սուրեն Գրիգորյանը հայտնել է, հունվարի 1-ից մինչև փետրվարի 28-ը ձեռքբերված տոմսային փաթեթներն ակտիվացման պահից հավելյալ ստանալու են 30-օրյա օգտագործման ժամկետ։
Քվեարկությունից առաջ քաղաքային իշխանության և ընդդիմադիր ավագանու անդամների միջև տրանսպորտի ուղեվարձի շուրջ քննարկման ժամանակ վեճ էր սկսվել, որին միջամտել էին ոստիկանները, այնուհետ՝ կարմիր բերետավորները։ Ավագանու նիստում սկսված վեճն ու հրմշտոցը շարունակվել էր նաև քաղաքապետարանի միջանցքում։ Կարմիր բերետավորները նիստերի դահլիճից հեռացրել էին ավագանու «Մայր Հայաստան» խմբակցության անդամներին։
Armenia Today-ին ՀՀ ՆԳՆ ոստիկանության հասարակայնության հետ կապի և լրատվության վարչությունից հայտնեցին, որ Երևանի քաղաքապետարանից բերման ենթարկվածներ չկան։
2024 թվականի մարտի 12-ին Երևանի ավագանին ընդունել էր տոմսերի միասնական համակարգ ներդնելու նախագիծը, որն սկսել էր գործել 2025 թվականի հունվարի 1-ից և նախատեսում էր տրանսպորտի թանկացում։
2024 թվականի դեկտեմբերի 20-ին քաղաքապետարանը հետաձգել էր համակարգի ներդրումը մինչև փետրվարի 1-ը։ Հունվարի 19-ին Երևանի նախկին քաղաքապետ Հայկ Մարությանը և «Մայր Հայաստան» դաշինքի առաջնորդ Անդրանիկ Թևանյանը երևանցիներին կոչ էին արել բոյկոտել փետրվարի 1-ից մայրաքաղաքում տրանսպորտի սակագինը բարձրացնելու իշխանությունների ծրագրերը և ստորագրահավաքներ նախաձեռնել տրանսպորտի ուղեվարձի թանկացման դեմ։ Մարությանի թիմը հայտնել էր 76 հազար ստորագրություն հավաքելու մասին և կոչ արել փետրվարի 1-ից, ի նշան բողոքի, հասարակական տրանսպորտից օգտվելու դեպքում վճարել 100 դրամ։
Երևանի քաղաքապետ Տիգրան Ավինյանը հունվարի 28-ին հայտարարել էր, որ Երևանի քաղաքապետարանը որոշել է փետրվարի 1-ից հասարակական տրանսպորտով մեկ ուղևորության համար նոր սակագին սահմանել՝ 150 դրամ։ Ի պատասխան՝ Մարությանը կոչ էր արել փետրվարի 1-ից չչեղարկել բոյկոտը։ Թևանյանը տրանսպորտի գնի վերաբերյալ իշխանության քաղաքականությունը «թուրքական բազար» էր որակել և կոչ արել շարունակել ճնշումը։
