Իտալիայի Վիտերբոյի եպիսկոպոս Օրացիո Ֆրանչեսկո Պիացցան հուլիսի 5-ին ուխտագնացության նպատակով կայցելի Հայաստան, հաղորդում է Assadakah news-ը:
Սա Վիտերբոյի թեմի առաջին այցն է Հայաստան, որը եպիսկոպոսը համեմատել է «Արարատ լեռանը դիպչելու» հետ։ Ըստ նրա՝ սա պատմության խորհրդանիշ է, որը «միավորում է նահատակության ցավը և հավատքի փառքը»:
Նա Հայաստան կժամանի մի քանի քահանայի հետ։ Եպիսկոպոսն այս ուխտագնացությունն անվանել է «մուտք քաղաքակրթության մեջ»՝ հնարավորություն «մոտենալու հայ ծիսական ավանդույթներին և կրոնական խորությանը, պատմական և մշակութայի՝ հասկանալու համար այն ազգին, որը տարբեր ձևերով ճանաչել է նահատակությունը»։
Հրատարակությունը նշում է, որ Հայաստանում ապրող եպիսկոպոսի ընկերը նրան ասել է. «Անհնար է մեկ անգամ այցելել Հայաստան։ Տպավորությունները կպահանջեն երկրորդ այցելություն»։ Եվ հենց այս գիտակցումն էր, որ նրան դրդել է հրաժարվել զբոսաշրջային երթուղուց՝ ավելի խորը մոտեցման համար, խոստովանել է Վիտերբոյի եպիսկոպոսը։
Նա կտրականապես համաձայն չէ այն կարծիքի հետ, որ հայերը մոռացվել են Վատիկանի կողմից՝ հիշեցնելով, որ որոշ պապեր, այդ թվում՝ հանգուցյալ Ֆրանցիսկոսը, առաջինն էին, որ օգտագործեցին «ցեղասպանություն» բառը՝ նկարագրելու համար հայերի հետ կատարվածը։
«Իհարկե, այս բառի օգտագործումը հետևանքներ ունի պետությունների միջև հարաբերություններում, բայց դա չպետք է շեղի ուշադրությունը ճշմարտությունից»,- կարծում է իտալացի հոգևորականը։
Եպիսկոպոսը նշել է, որ Հայաստան ուխտագնացությունը կարող է վերադառնալ «քրիստոնեության ակունքներին, որը Հայաստանը ձեռք է բերել 4-րդ դարում»։ Պիացցան նաև ցանկանում է հասկանալ այն հավատքի խորը իմաստը, որը դիմադրել է ամեն ինչի, «քանի որ այսօր ապրում ենք մի աշխարհում, որը կորցրել է իր ինքնությունը»։
Նրա խոսքով՝ Սուրբ Գրիգոր Լուսավորչի կերպարը դառնում է իր համար հայկական իրականությունը հասկանալու բանալին, և այս այցը նաև կդառնա փորձառություն՝ ինչպես Արարատի գագաթ բարձրանալը, հասկանալու համար, թե որն է ուխտագնացության բարձրագույն իմաստը՝ գտնել ինքդ քեզ՝ հանդիպելով մեկ ուրիշի հետ, բացահայտել քո հավատը՝ լսելով այն մարդկանց հավատքը, ովքեր այն պահել են սրբազան կրակի պես»։
Ֆրանցիսկոս պապը մահացել էր ապրիլի 21-ին՝ 88 տարեկան հասակում։ Ապրիլի 22-ին վարչապետ Նիկոլ Փաշինյանը ցավակցական հեռագիր էր հղել նրա մահվան կապակցությամբ։ Ապրիլի 26-ին պապի հուղարկավորությանը մասնակցել էին Ամենայն Հայոց կաթողիկոս Գարեգին Երկրորդը և ՀՀ նախագահը։
Կարդինալների ժողովը Հռոմի 267-րդ պապին ընտրել էր մայիսի 8-ին՝ երրորդ փորձից։
