Վարչապետ Նիկո Փաշինյանն առաջարկել է հուլիսի 1-ից հանրային կոնսենսուս ձեռքբերել և խոստացել, որ մինչև հուլիսի 5-ը վետո կդնում իր կողմից «պարականոն» բառապաշարի և խոսույթի կիրառման վրա, հայտնել է Փաշինյանը։
«Առաջարկում եմ հանրային կոնսենսուս ձեռքբերել, որ մի իքս ամսաթվից հանրային-քաղաքական-հրապարակային դաշտում հայհոյախոսությանը և հիբրիդային թիրախավորումը դադարեցնում ենք, անցնում բացառապես քաղաքակիրթ և հարգալից բանավեճի, և միայն ստուգված փաստերի վրա հիմնվելու տրամաբանությանը»,-գրել է նա սոցցանցերում։
Փաշինյանը հավելել է, որ հուլիսի 5-ին կկիսվի «իր տպավորությամբ, թե ի՞նչ արձագանք է գտել առաջարկը հանրության և սոցիալական ցանցերի օգտատերերի շրջանում»։
Մայիսի 29-ից սկսած վարչապետ Նիկոլ Փաշինյանը սոցիալական ցանցերում հայհոյանքներով լի մի շարք գրառումներ էր արել Հայ Առաքելական եկեղեցու ներկայացուցիչների հասցեին, իսկ ավելի ուշ հանդես եկել նոր կաթողիկոս ընտրելու կոչով։ Հունիսի 2-ին նա կասկածի տակ էր դրել Գարեգին Բ-ի կուսակրոնության ուխտի պահպանումը։ Այնուհետ Փաշինյանը հայտարարել էր, թե պատրաստ է Ամենայն Հայոց կաթողիկոս Գարեգին Բ-ին ապացուցել, որ ինքը թլփատված չէ։ Փոխարենը նա Վեհափառին կրկին կոչ էր արել «պատասխանել հարցին՝ խախտե՞լ է արդյոք կուսակրոնության ուխտը, և ունի՞ արդյոք զավակ»։
Մի քանի օր անց՝ հունիսի 7-ին, Հայաստանի առաջին նախագահ Լևոն Տեր-Պետրոսյանը հանդիպել էր կաթողիկոսի հետ՝ քննարկելու իշխանությունների՝ Եկեղեցու դեմ իրականացվող արշավը և այդ համատեքստում գործարար Սամվել Կարապետյանի ձերբակալությունը։ Նախկին նախագահը Փաշինյանին բնութագրել էր որպես «պարտության մարմնավորում» և վստահություն հայտնել, որ վարչապետը պարտվելու է Հայ Առաքելական եկեղեցու դեմ հռչակած պատերազմում։
Ի պատասխան՝ Փաշինյանը իր նախկին թիմակցին՝ Տեր-Պետրոսյանին, մեղադրել էր՝ Հայաստանի անկախության առաջին տարիներից երկիրը «մարիոնետային պետության» վերածելու մեջ։ Վարչապետը նրան անվանել էր «վախկոտ, կամազուրկ»։ Իսկ նրա և Կաթողիկոսի հանդիպումից հետո գրել էր, թե «նա իհարկե պիտի կանգնի իր նման ժողովրդատյաց կեղծարարի ու կեղծիքի կողքին»։
Ավելի վաղ՝ հունիսի 24-ին, վարչապետի կինը ևս վիրավորական խոսքեր էր հնչեցրել Տեր-Պետրոսյանի հասցեին՝ անվանելով նրան «գիտնական ոջիլ» և «ազգադավ վիժվածք»:
Հունիսի 25-ին իրավապահ մարմինները խուզարկություններ և ձերբակալություններ էին իրականացրել ընդդիմադիր «Սրբազան պայքար» շարժման կողմնակիցների տներում։ Շարժման առաջնորդ՝ արքեպիսկոպոս Բագրատ Գալստանյանին ԱԱԾ-ն ձերբակալել էր՝ կասկածելով նրան նախկին զինվորականներից կազմավորված զինված խմբավորումներ ստեղծելու և գործող իշխանության տապալման նախապատրաստման մեջ։ Դատարանը Գալստանյանին կալանավորել է երկու ամսով։
«Պետական հեղաշրջման պլան» անվանումով փաստաթղթի հիման վրա, որը հրապարակվել է Civic.am կայքում, և որին նախաքննությունն իրավական որակում է տվել որպես իշխանության բռնի զավթման փորձ, քննությունը պահանջել է կալանավորել «Սրբազան պայքար» շարժման 16 մասնակիցների։
«Լուսավոր Հայաստան» կուսակցության ղեկավար Էդմոն Մարուքյանը, ի նշան բողոքի Շիրակի թեմի առաջնորդի ձերբակալության դեմ, հունիսի 27-ին հրաժարվել էր իր թեկնածության առաջադրումից վարչապետի պաշտոնի համար՝ իմփիչմենթի գործընթացի շրջանակում՝ ի օգուտ Աջապահյանի։ Այս նախաձեռնությանը միացել էր նաև «Հայաստան» ընդդիմադիր խմբակցությունը։ Քննչական կոմիտեում գտնվող Աջապահյանը հանդես էր եկել ուղերձով՝ հորդորելով չընդգրկել իր անունը վարչապետի թեկնածուների թվում։
