Հայաստանի 17 քաղաքացուց բաղկացած տուրիստական խումբը Երուսաղեմում սպասում է պետական աջակցության, Facebook-ի իր էջում գրել է օգտատեր Լիլիթ Ղարիբյանը, ում ընկերուհին՝ Մարտա Փալոյանը, նույնպես խմբի մեջ է։
Քաղաքացիները Երուսաղեմում են Իսրայելի և Իրանի միջև սկսված հակամարտության պատճառով, ինչի հետևանքով թռիչքներ են չեղարկվել։
«Իմ ընկերուհին և 16 հայ այս պահին գտնվում են Երուսաղեմում։ Տեղում իրավիճակը փոխվում է ամեն րոպե, և նրանք ակնկալում են Հայաստանի կողմից հստակ տեղեկատվություն, ուղեցույց և աջակցություն»,- գրել է նա։
Ղարիբյանը դիմել է ՀՀ ԱԳՆ-ին, ՀՀ կառավարության Տուրիզմի հայկական ֆեդերացիային, Իսրայելում ՀՀ դեսպանություն և համապատասխան կառույցներին՝ խնդրելով հնարավորինս արագ արձագանքել, քանի որ ՀՀ քաղաքացիներին ուղղություն, անվտանգություն և հստակեցում է պետք։
Իսրայելը հունիսի 12-ի լույս 13-ի գիշերը հարվածել էր Իրանին։ Նույն օրն Իրանը բալիստիկ հրթիռների կիրառմամբ պատասխան հարվածներ էր հասցրել Իսրայելին։ ՀՀ ԱԳՆ-ն դատապարտել էր Իսրայելի հարձակումն Իրանի վրա։
Հունիսի 15-ին ՀՀ արատքին գործերի նախարարության խոսնակ Անի Բադալյանն Armenia Today-ին հայտնել էր, որ Իրանում և Իսրայելում ՀՀ դեսպանությունները հանդես են եկել համապատասխան հաղորդագրություններով՝ տրամադրելով անհրաժեշտ կոնտակտային տվյալներ, որոնց միջոցով մշտական կապ է պահպանվում ՀՀ քաղաքացիների հետ:
