Աշխարհի տարբեր երկրներում գործող առցանց ԶԼՄ-ների հրատարակիչներն սպասում են որոնողական համակարգերից եկող թրաֆիկի կտրուկ անկման առաջիկա երեք տարիներին, քանի որ արհեստական բանականության կողմից կազմվող ամփոփագրերն ու չատ-բոտերը փոխում են բովանդակության սպառման ձևերը, ասվում է Reuters-ի Ժուռնալիստիկայի ուսումնասիրության ինստիտուտի (RISJ) զեկույցում։
Հետազոտության շրջանակում հարցում է անցկացվել 51 երկրի 280 մեդիա ղեկավարից։ Նրանց գնահատմամբ՝ որոնողական համակարգերից իրականացվող անցումների քանակը երեք տարվա ընթացքում կնվազի 43%-ով։ Հարցման մասնակիցների երեք քառորդը 2026 թվականին ծրագրում է իրենց լրագրողներին առաջարկել օրինակ վերցնել YouTube-ի և TikTok-ի բլոգերներից, քանի որ կարճ տեսանյութերի և աուդիո բովանդակության հանրաճանաչությունը շարունակում է արագ աճել։ Միևնույն ժամանակ, հարցվածների կեսը նախատեսում է համագործակցել արտաքին բլոգերների հետ՝ բովանդակության տարածման նպատակով։
Գլոբալ մակարդակում վերջին մեկ տարվա ընթացքում նորությունների կայքեր որոնողական թրաֆիկը նվազել է մոտ մեկ երրորդով՝ արհեստական բանականության ամփոփագրերի ու չատ-բոտերի ի հայտ գալու, ինչպես նաև որոնողական ալգորիթմների փոփոխությունների պատճառով, որոնք «կենսական նշանակություն ունեն» մի շարք մեդիա ընկերությունների գործունեության համար։
Ամենամեծ անկումը նկատվում է այն լրատվամիջոցների մոտ, որոնք հրապարակում են նյութեր լայֆսթայլի, ճանապարհորդությունների և հայտնի անձանց մասին։ Մինչդեռ այն ԶԼՄ-ները, որոնք իրականացնում են ուղիղ եթերներ և հեռարձակումներ, ավելի մեծ չափով «պաշտպանված» են արհեստական բանականության կողմից կազմվող ամփոփագրերի հետ մրցակցության պայմաններում։
Google-ի արհեստական բանականության կողմից ստեղծված ակնարկներն արդեն ցուցադրվում են ԱՄՆ-ում որոնման արդյունքների մոտ 10%-ի վերին հատվածում, և նման գործընթացը լայնորեն տարածվում է նաև այլ երկրներում։ ChatGPT-ից դեպի լրատվական կայքեր անցումների քանակն աճում է, սակայն RISJ-ի զեկույցում այդ հոսքը դեռևս գնահատվում է որպես «աննշան շեղում»։
