Ռուսաստանի նախագահ Վլադիմիր Պուտինի միջազգային մշակութային համագործակցության հարցերով հատուկ ներկայացուցիչ Միխայիլ Շվիդկոյը դատապարտել է ադրբեջանցիների կողմից օկուպացված Արցախում հայկական հուշարձանների ոչնչացումը, հայտնում է RBC-ն։
«Մշակութային գործիչների արձանների ապամոնտաժումը, նրանց անարգելը, որտեղ էլ դա տեղի ունենա, չի կարող գերբացասական վերաբերմունք չառաջացնել։ Մշակութային գործիչների հուշարձանների քանդումը փաստարկ չէ ո՛չ պատմության, ո՛չ քաղաքականության մեջ»,- նշել է նա։
Շվիդկոյի խոսքով՝ մշակույթը չի կարող ապրել միջպետական հարաբերություններից, քաղաքականությունից դուրս, բայց, միևնույն ժամանակ, այն պետք է ժողովուրդների միջև կապող թել մնա։
«Քաղաքականությունն ապրում է ներկայում, իսկ մշակութային հարաբերությունները՝ հավերժության մեջ, ինչը պետք է հասկանալ։ Սա շատ դժվար թեմա է քննարկելու և երկխոսելու համար, բայց պետք է երկխոսություն լինի»,- հավելել է հատուկ ներկայացուցիչը։
2023 թվականի սեպտեմբերից ի վեր Ադրբեջանը հողին է հավասարեցրել Արցախում չորս գյուղ և ոչնչացրել մի քանի տասնյակ մշակութային հուշարձաններ, այդ թվում՝ ավելի քան 10 եկեղեցի, գրեթե 50 հուշահամալիր, քանդակներ և խաչքարեր: Armenia Today-ը տեղեկություններ է հավաքել Լեռնային Ղարաբաղի տարածքում ոչնչացված պատմական և մշակութային նշանակության բոլոր հուշարձանների մասին, որոնք դարձել են Բաքվի կողմից իրականացվող մշակութային ցեղասպանության քաղաքականության զոհ։
Արցախի մշակույթի և զբոսաշրջության զարգացման գործակալությունը 2025-ի օգոստոսի 25-ին տեղեկացրել էր, որ ադրբեջանցիները ոչնչացրել են օկուպացված Ստեփանակերտի բոլոր 25 հուշարձանները։
