Ռուսաստանի հայերի միության (ՌՀՄ) նախագահ Արա Աբրահամյանը դիմել է Ռուսաստանի արտաքին գործերի նախարարությանը՝ Իրանում տեղի ունեցող իրադարձությունների ֆոնին խնդրելով քայլեր ձեռնարկել Բաքվում արտակարգ վայրէջք կատարած ինքնաթիռներում գտնվող հայերի անվտանգությունն ապահովելու համար։
Իրանի, Իրաքի և Իսրայելի օդային տարածքում սահմանված սահմանափակումների պատճառով հունիսի 13-ի առավոտյան Բաքվում վայրէջք է կատարել ավելի քան 10 ինքնաթիռ։ Դրանց թվում էին Մոսկվայից, Մինսկից, Կազանից և այլ երկրներից Դուբայ չվերթերը։ Այդ չվերթերի ուղևորների թվում կան հայկական ծագում ունեցող քաղաքացիներ, որոնք մեկնում էին ԱՄԷ։
«Հաշվի առնելով պաշտոնական Բաքվի կողմից տասնամյակներ շարունակ ադրբեջանական հասարակության մեջ տարածվող հայատյաց քաղաքականությունը, ինչպես նաև Բաքվում հայտնված հայերի ձերբակալության և դաժան վերաբերմունքի հայտնի փաստերը՝ ինչպես 44-օրյա պատերազմից առաջ, այնպես էլ դրանից հետո, Աբրահամյանը ՌԴ ԱԳՆ-ին խնդրել էվերահսկողություն հաստատել իրավիճակի նկատմամբ՝ կանխելու համար Ադրբեջանի իշխանությունների կողմից Բաքվում արտակարգ վայրէջք կատարած ինքնաթիռներում գտնվող հայազգի անձանց նկատմամբ հնարավոր անօրինական գործողությունները»,- ասվում է հաղորդագրությունում։
Նշվում է, որ ուղևորների հարազատների խոսքով՝ Դուբայ մեկնող մեր հայրենակիցների հետ ներկայումս կապի դուրս գալ չի հաջողվում։
Ռուսաստանի հայերի միությունը Հայաստանի արտաքին գործերի նախարարությանը նաև կոչ է անում անել հնարավոր ամեն բան՝ Բաքու իրենց կամքին հակառակ վայրէջք կատարած հայերի անվտանգությունն ապահովելու համար։
Իսրայելը հունիսի 12-ի լույս 13-ի գիշերը հարվածել է Իրանի մի շարք շրջանների, կան զոհեր և վիրավորներ: Իրանն, իր հերթին, ըստ ԶԼՄ-ների, ԱԹՍ-ներ է արձակել Իսրայելի ուղղությամբ:
