Քննչական կոմիտեն սկսել է ուսումնասիրել Ներքին գործերի նախարարությունից ստացած հաղորդումը ՀՀ քաղաքացիներին արտերկրում՝ ՀՀ քաղաքացի հանդիսացող գործարարներին խորհրդարանական ընտրություններում աջակցելուն հնարավոր դեպքերի մասին, հայտնել են ՔԿ-ից։
Գերատեսչությունից չեն մանրամասնել, թե խոսքը որ երկրի, կոնկրետ որ հատուկ ծառայության մասին է, չեն նշել նաև այն քաղաքական ուժերի անունը, որոնց օգտին, ըստ նրանց, փորձում են գործել անհայտ անձինք՝ ենթադրաբար ճնշում գործադրելով։
Արտաքին հետախուզության ծառայությունը մարտի 10-ին հայտարարություն էր տարածել, որտեղ պնդում է հնարավոր դեպքերի մասին: Ըստ այդմ, այլ երկրում տարբեր դերակատարներ փորձում են ճնշում գործադրել տնտեսական գործունեությամբ զբաղվող ՀՀ քաղաքացիների նկատմամբ՝ դրդելով նրանց աջակցելու Հայաստանում սպասվող խորհրդարանական ընտրություններին մասնակցության հայտ ներկայացրած քաղաքական որոշ ուժերի: Ծառայությունը չի մանրամասնել, թե որ ուժերի մասին է խոսքը:
Ըստ ՆԳՆ-ի՝ տեղեկատվությունը վերաբերում է «նյութապես շահագրգռելու ձևով ընտրական իրավունքի ազատ իրականացմանը խոչընդոտելու կամ այլ կախվածությունն օգտագործելով ընտրությանը մասնակցելուն հարկադրելուն»:
ՆԳՆ-ն քաղաքացիներին կոչ է արել լինել զգոն և նմանատիպ դեպքերի մասին տեղեկություն ունենալու դեպքում դիմել ոստիկանություն՝ զանգահարելով 112 կամ տեղեկատվություն ուղարկելով [email protected] էլ․ հասցեին կամ azdararir.am հարթակի միջոցով:
Արտաքին հետախուզության ծառայությունը նշել է, որ շարունակում է հետևել զարգացումներին և, անհրաժեշտության դեպքում, հանրությանը կտրամադրեն լրացուցիչ տեղեկություն։
Հունիսի 7-ին կայանալիք խորհրդարանական ընտրություններին մասնակցելու համար արդեն իսկ հայտ են ներկայացրել մի շարք քաղաքական ուժեր: Իշխող «Քաղաքացիական պայմանագիր» կուսակցությունը նախընտրական ցուցակի ձևավորման աշխատանքներ է տանում։ Ընդդիմադիր դաշտում ընտրություններին մասնակցելու պատրաստակամություն են հայտնել «Հայաստան» դաշինքը, «Ուժեղ Հայաստան» կուսակցությունը (գործարար Սամվել Կարապետյանի գլխավորությամբ), «Բարգավաճ Հայաստան» և «Մայր Հայաստան» դաշինքը (Գագիկ Ծառուկյան և Անդրանիկ Թևանյան), ՀՅԴ «Դաշնակցությունը», «Հայ Ազգային Կոնգրեսը» (Լևոն Զուրաբյան), «Միասնության թևերը» (Արման Թաթոյան), «Նոր ուժը» (Հայկ Մարության), «Լուսավոր Հայաստանը» (Էդմոն Մարուքյան), «Հանրապետություն» կուսակցությունը (Արամ Սարգսյան), «Հայաստանի շնորհապետական կուսակցությունը» (Գուրգեն Սիմոնյան) և «Բոլորին դեմ եմ» շարժումը։
